სასიყვარულო სამკუთხედი თავიდანვე განწირულია. სამწუხაროა, რომ ქეთი ამას გვიან მიხვდა. ცდილობდა, რომ საყვარელი მამაკაცი ოჯახიდან წამოეყვანა, მისთვის ბავშვი გაეჩინა, მაგრამ ამაოდ. მისი საყვარელი საქორწინო კავშირს ზედმეტად აფასებს. ქეთი თავის ისტორიას დეტალურად გვიამბობს.
„ჩემი შვილი მალე 6 თვის გახდება, მაგრამ მამამისი, დათო, ცოლის მიტოვებაზე არც ფიქრობს. მიჭირს იმის გაცნობიერება, რომ ბავშვის დახმარებით მისი მოტყუების მცდელობამ მარცხი განიცადა. რა გავაკეთო ახლა? ვინ მომიყვანს შვილიანს? იმედი მაქვს, რომ მის ცოლს ბოროტება ბუმერანგივით დაუბრუნდება. როგორ შეიძლება, რომ ბავშვს მამა წაართვა!
თავიდან ყველაფერი ზღაპრულად დაიწყო. დათო 2 წლის წინ გავიცანი. იმ საღამოს მეგობარმა დაბადების დღეზე დამპატიჟა. ბევრი სტუმარი არ იყო, ამიტომ დრო გულითად საუბარში გავატარეთ. მაშინ ზამთარი იყო. სიბნელეში სახლში ვბრუნდებოდი, რომ სადარბაზოსთან ერთი კაცი გამომელაპარაკა. ჩვეულებრივ, უცნობებს გვერდს ვუვლი, მაგრამ ამ ადამიანმა ჩემში ნდობა აღძრა. ეს დავითი იყო. გაცნობის მომენტში ძალიან საყვარელი და მეგობრული იყო. ისეთი შეგრძნება მქონდა, თითქოს წლებია ვიცნობდი. ყველაფერი იმით დასრულდა, რომ ჩემთან სახლში ფინჯან ჩაიზე დავპატიჟე, მაგრამ ჩვენი ურთიერთობა უფრო შორს წავიდა.
დათოსთან შესანიშნავი ურთიერთობა მქონდა. ასეთი შესანიშნავი მამაკაცი არასდროს შემხვედრია. მასთან ერთად კინოში, რესტორნებში დავდიოდით, თაიგულებით და კომპლიმენტებით მავსებდა, მაგრამ ჩვენს ურთიერთობაში ერთი ნაკლი იყო. ჩემი საყვარელი მამაკაცი ცოლიანია. მაშინვე აღიარა, რომ ცოლი არ უყვარს და მასთან ბავშვის გულისთვის ცხოვრობს. პირველივე შესაძლებლობაზე განქორწინებას დამპირდა.
ვაღიარებ, როცა დათო გავიცანი, მეც ურთიერთობაში ვიყავი. ახალი სიყვარულის გამო მასთან დაშორებაში ხელი არაფერს შეუშლია. დათოსგანაც იმავეს ველოდი. ვეჭვიანობდი კიდეც, განვიცდიდი და ღამეები არ მეძინა, როცა ჩემ გვერდით არ იყო. ორსულობის ამბავმა ძალიან გამიხარა. დიდხანს არ მიფიქრია და ახალი ამბავი საყვარელ ადამიანს ვაცნობე. ველოდი, რომ მასაც გაუხარდებოდა, მაგრამ რატომღაც პანიკაში ჩავარდა, როცა ჩემს ორსულობაზე გაიგო. თავიდან ვიფიქრე, რომ შოკირებული იყო და ამიტომ აქვს ასეთი რეაქცია. გულის სიღრმეში ვიმედოვნებდი, რომ ბავშვი ცოლთან მის დაშორებას შეძლებდა.
ახლა ჩემი პატარა თითქმის 6 თვისაა და დათო როგორც ცხოვრობდა ცოლთან ერთად, ისევ ისე ცხოვრობს. არაფერი შეცვლილა, ოღონდ ჩვენი შეხვედრები უფრო იშვიათი და ცივი გახდა. გვიან გავაცნობიერე, რომ დათოს ბავშვი არ სჭირდება. როგორც მე. მიჭირს იმის გააზრება, რომ ჩვენი ურთიერთობა დასრულდა. ახლა ბავშვთან ერთად მარტო დავრჩი. დათომ ცოლი აირჩია. ალბათ, ძალიან ბედნიერი ქალია, რომ მისი შენარჩუნება შეძლო, მაგრამ რა გავაკეთო მე?“
