შეიძლება თუ არა პარტნიორთან აბსოლუტურად გულწრფელი იყოთ? ამ კითხვაზე ყველამ თავად უნდა უპასუხოს. ვარდო ქმარს პატარა საიდუმლოს უმალავდა. თვლიდა, რომ ეს ოჯახს ზიანს არ მიაყენებდა, თუმცა საიდუმლოს ახდის შემდეგ ოჯახი განქორწინების ზღვარზე აღმოჩნდა. Vivien გიამბობთ, რა საიდუმლომ გააბრაზა მეუღლე ასე ძალიან.
„იმ საღამოს დედამთილ–მამამთილთან ერთად ვახშმობდით. ქმარმა სამომავლო გეგმებზე საუბრისას აღნიშნა, რომ საკუთარი სახლის აშენებას გეგმავს, რადგან მშობლებთან ერთად ცხოვრება აღარ სურს. მათ ამ გადაწყვეტილებას მხარი დაუჭირეს. ფულით დახმარების სურვილიც გამოთქვეს, მაგრამ ერთი პირობით. ჩემს ოჯახსაც მსგავსი თანხა უნდა გაეღო. მაშინ ვიფიქრე, რომ ჩემი საიდუმლოს გასამხელად საუკეთესო მომენტი იყო.
არასრულ ოჯახში გავიზარდე. დედამ და ბებიამ გამზარდა. მამამ მიგვატოვა, როცა ძალიან პატარა ვიყავი. ყველა ერთად ოროთახიან ბინაში ვცხოვრობდით. როცა ბებია გარდაიცვალა, მისი გაყიდვა და ორი ერთოთახიანი ბინის ყიდვა გადავწყვიტეთ. ერთში მე და დედა ვცხოვრობდით, მეორეს ვაქირავებდით. ასე დამატებითი შემოსავალი გვქონდა, რომელსაც უნივერსიტეტში ჩემს სწავლაზე ვხარჯავდი.
დიპლომის აღების შემდეგ ბინა კარგ შემოსავალს გვაძლევდა. დედა ფულს ბანკში ანგარიშზე ინახავდა. როცა გავთხოვდი, მირჩია, რომ ქმრისთვის ამ ფულზე ჯერ არაფერი მეთქვა. შემდეგ კი მეუღლე მსხვილი თანხით მოულოდნელად გამეხარებინა. ქორწილის, ყოველდღიურობის და ოჯახური საზრუნავის გამო ქმრისთვის ამის თქმა დამავიწყდა. აი, სიმართლის დრო დადგა.
არავინ იცის, რა რეაქცია ექნება ხალხს, როცა საიდუმლოს შესახებ გაიგებენ. ღმერთმა იცის, ქმრისგან ასეთ რეაქციას არ ველოდი. ქორწილის შემდეგ ქმრის მშობლებთან ერთად ვცხოვრობდით. როცა დედამთილ–მამამთილმა გაიგო, რომ მთელი ეს დრო საკუთარი ბინა მქონდა, გაბრაზდნენ. „როგორ შეგეძლო ამის დამალვა? ეს ქორწილამდე უნდა გეთქვა!“– ყვიროდნენ ისინი. ქმარს უფრო მშვიდი რეაქცია ჰქონდა. განაცხადა, რომ ამის შემდეგ ჩემს ნდობას ვეღარ შეძლებდა. ეს სიტყვები გულში დანის ჩარტყმას ჰგავდა. არადა ვიფიქრე, გავახარებდი.
მთელი საღამო ვკამათობდით, დილით ჩემი ნივთები შევაგროვე და დედასთან გადავედი. კამათის შემდეგ ქმართან და მის ოჯახთან მშვიდობის აღდგენა არაერთხელ ვცადე. ჩემს ბინაში გადასვლა ან მისი გაყიდვა და კერძო სახლის ყიდვა შევთავაზე, მაგრამ ამაოდ. ქმარი ურყევი იყო. იმეორებდა, რომ არ სურს საერთო ჰქონდეს ქალთან, რომელსაც რაღაც მსგავსის დამალვა შეუძლია.
დედაჩემი საკუთარ თავს იდანაშაულებს. ამბობს, რომ ჩემთვის ქმრისგან ბინის დამალვა რომ არ ერჩია, ახლა ჩვენს ოჯახში ყველაფერი კარგად იქნებოდა. არ ვადანაშაულებ. ქმრის მოქმედება არ მესმის. უნდა უხაროდეს, რომ ასე უცებ ამდენი ფული გაუჩნდა, რომელზეც ოცნება არ შეეძლო. მაგრამ არა, რატომღაც საკუთარ თავს ზიანს აყენებს. მეორე მხრივ, ნუთუ შეეძლო ნამდვილად მოსიყვარულე ადამიანს ასეთი წვრილმანის გამო ჩემს შესახებ აზრის შეცვლა.“
