ობი ახალგარემონტებულ სააბაზანო ოთახშიც შეიძლება გაჩნდეს. საქმეს დროულად უნდა მიხედოთ. სოკო ადამიანის ჯანმრთელობისთვის სახიფათოა. გარდა ამისა, სააბაზანო ოთახი ის ადგილია, სადაც იდეალური სისუფთავე უნდა დაიცვათ. ობი სააბაზანო ოთახში საუკეთესო მეზობელი არაა. თუ კაფელზე, ჭერზე, კედელზე, სანტექნიკაზე სოკოს პირველი დაგროვება შენიშნეთ, დაუყონებლივ მისი მოშორება სცადეთ. პრობლემის უგულებელყოფა მშრალ ხველას, კანზე გამონაყარს, სინუსიტს, ასთმას და პნევმონიას გამოიწვევს. ჯანმრთელობას პირდაპირ საფრთხეს უქმნის. Vivien გიამბობთ, როგორ მოიშოროთ ობი სააბაზანო ოთახში ზედმეტი ხარჯის გარეშე.
ობი სააბაზანო ოთახში: როგორ მოვიშოროთ სოკო მარტივად
დაგჭირდებათ:
- კბილის ჯაგრისი
- მათეთრებელი
- რესპირატორი
- რეზინის ხელთათმანები
ობის მოშორება სააბაზანო ოთახში
- პირველ რიგში, რესპირატორი და რეზინის ხელთათმანები გაიკეთეთ. მათეთრებელი ქიმიაა, რომელიც კანს და სასუნთქ გზებს აზიანებს. გარდა ამისა, სათვალე გაიკეთეთ.
- კბილის ჯაგრისით მათეთრებელი სოკოთი დაინფიცირებულ ზედაპირს წაუსვით.
- იმდენი საშუალება შეაზილეთ, რამდენიც საჭიროა, რომ ობი მოშორდეს. ეს ყველაფერი ზედაპირში სოკოს დაგროვების სიღრმეზეა დამოკიდებული.
- თუ სოკო ძალიან ღრმად ჩამჯდარია, ბამბის დისკები გამოიყენეთ. მათეთრებლით გაჟღინთეთ და ზედაპირს დაადეთ. კარგად დააჭირეთ. 8 საათით გააჩერეთ, შემდეგ ჯაგრისით ობის ნარჩენები მოაშორეთ.
როგორ არ დავუშვათ ობის გაჩენა სააბაზანო ოთახში – მას შემდეგ, რაც ობს მოიშორებთ, მისი წარმოქმნის მიზეზზე დაფიქრდით. სოკოს სველი და თბილი გარემო უყვარს. სააბაზანო ოთახი მისთვის იდეალურია. სოკოს გავრცელების თავიდან ასაცილებლად ოთახში ვენტილაციის პრობლემა მოაგვარეთ. არა მხოლოდ სპეციალური სავენტილაციო სისტემა, არამედ ჰაერის გამშრობი დაგეხმარებათ. გარდა ამისა, ყველა ზედაპირის გაწმენდა ჩვევად გქონდეთ, რომ ობს შანსი არ დარჩეს: ნიჟარა, აბაზანა, თაროები. ხალიჩა, პირსახოცი და ფარდა რეგულარულად გარეცხეთ. თუ სააბაზანო ოთახში წყლის გაჟონვის ადგილია, იპოვეთ და შეაკეთეთ.
მათეთრებლის გამოყენებისას სიფრთხილე გამოიჩინეთ. თუ საშუალება თვალში ან კანზე მოგხვდათ, დაზიანებული ადგილი დაუყონებლივ ბევრი წყლით ჩამოიბანეთ. ყველა ინსტრუქცია დაიცავით და სოკო სააბაზანო ოთახში სამუდამოდ დაგავიწყდებათ!
