ბევრი მებოსტნე ზრდის თავის ნაკვეთზე პარკოსან კულტურებს. მათ შორის ყველაზე პოპულარულია ლობიო, რადგან არის ძალიან გემრიელი, სასარგებლო და ზრდის პირობების მიმართ უპრეტენზიო. მარცვლოვანი და პარკოსანი კულტურების გაზრდა შედარებით ადვილია. როგორც წესი, პრობლემები მოსავლის შენახვისას ჩნდება. ლობიო მუქდება, ობით იფარება, მასში მავნე მწერები მრავლდება. ამის თავიდან ასაცილებლად ლობიოს შენახვის წესი უნდა იცოდეთ.
ვივიენი ამ წესს გაგიმხელთ.
როგორ შევინახოთ ლობიო სახლის პირობებში
როგორც მომწიფებული, ასევე ახალი ლობიო შეგიძლიათ შეინახოთ. გამოუმშრალი ლობიოს მარცვლები ხარისხდება, პაკეტებში ნაწილდება და საყინულეში ინახება. იქ კარგად ინახება და შემდეგ სწრაფად იხარშება.
მწიფე თესლს კარგად აშრობენ, ახარისხებენ, ნაგვისგან ასუფთავებენ და მომავალ მოსავლამდე ინახავენ. სათესლე მასალად შეიძლება დაგჭირდეთ. ლობიო უნდა შეინახოთ მშრალ და სუფთა კონტეინერში, რომელსაც თავსახური მჭიდროდ ეხურება. მისი თესლი შეგიძლიათ ჩაყაროთ მინის ქილაში, პლასტმასის ბოთლში ან სხვა მოსახერხებელ ჭურჭელში, რომელსაც თავსახური აქვს.
ლობიოს შესანახად შეგიძლიათ გამოიყენოთ ნაჭრის ქისები, რომლებიც მშრალ ადგილას თავსდება. მავნე მწერების დასაფრთხობად ქისებში ჩადეთ გამხმარი კამის ქოლგები, დაფნის ფოთლები ან ნივრის კბილი.
დიასახლისები, რომლებიც კერძო სექტორში ცხოვრობენ, ლობიოს შენახვის ძველ მეთოდს იყენებენ. ხმელ ლობიოს ტომრებში ყრიან და სხვენში ინახავენ. წინასწარ ტომარას მარილწყალში ასველებენ და აშრობენ.
მნიშვნელოვანია გახსოვდეთ, რომ ხოჭო ლობიოს თესლს ჯერ კიდევ ბოსტანში აზიანებს. მდედრი მწერი მწვანე პარკში კვერცხს დებს, შემდეგ გამოჩეკილი ლარვები მარცვლებში ღრმად აღწევს. მეაგარაკე, რომელსაც ეჭვი არაფერში ეპარება, პარკოსანი კულტურის მოსავალს იღებს და საკუჭნაოში აგზავნის.
კომფორტულ პირობებში მარცვალში მყოფი ლარვი თანდათან გადაიქცევა ზრდასრულ მწერად, რომელიც გარსს ხვრეტს და გარეთ გამოდის. ამ ეტაპზე ხოჭო ხილული ხდება და გამოუცდელ დიასახლისს უკვირს, საიდან? პასუხი მარტივია: ლობიო, რომელიც კვლებიდან აიღეთ, უკვე დაინფიცირებული იყო.
რა უნდა გააკეთოთ, თუ ლობიო დაინფიცირებულია
თუ ლობიოს ქილაში არასასურველი ხოჭო დაინახეთ, მისი შიგთავსი ყურადღებით შეამოწმეთ. ძალიან დაზიანებული მარაგის გადაყრა მოგიწევთ. ჭურჭელი, რომელშიც ლობიო ინახებოდა, ძმრით ან ლიმონმჟავით კარგად გარეცხეთ. თუ ლობიო მავნებლით ნაკლებად დაზიანებულია, მისი გადარჩენა სცადეთ.
პირველ რიგში, ლობიო გადაარჩიეთ, მარცვლები ლარვების კვალით მოაშორეთ. შემდეგ პარკოსანი მარილიან ცივ წყალში გააჩერეთ. დაზიანებული მარცვლები ამოტივტივდება. ისინი ამოიღეთ და დანარჩენ ნარჩენთან ერთად გადაყარეთ. შემდეგ ლობიო გარეცხეთ და გააშრეთ.
ხოჭოს გამრავლების თავიდან ასაცილებლად ლობიო ექვემდებარება მაღალ ან დაბალ ტემპერატურას. მარცვლები 60 გრადუსამდე გახურებულ ღუმელში მოათავსეთ და 30 წუთი გააჩერეთ. ამის შემდეგ ლობიო საკვებად შეგიძლიათ გამოიყენოთ, მაგრამ დასარგავად უკვე გამოუსადეგარია, რადგან არ გაღვივდება.
ლობიოს თესლი 2–3 დღე საყინულეში შეინახეთ. დაბალ ტემპერატურაზე მწერების უხილავი ლარვები მოკვდება. შემდეგ ლობიო გამოიღეთ და გააშრეთ ან მაცივარში შეინახეთ.
უხარისხო ან დაინფიცირებული ლობიო სამზარეულოში რომ არ მოხვდეს, ყურადღებით შეისწავლეთ ბოსტანში მზარდი პარკები, ასევე თესლი, რომელსაც ბაზარში ყიდულობთ. ლობიოს შენახვის პირობები დაიცავით და არასდროს გაფუჭდება.
