დროთა განმავლობაში ადამიანის კუნთები მოშვებული ხდება, ქსოვილები საკმარის საკვებს ვერ იღებენ, შედეგად ხრტილები და მალთაშუა დისკები იშლება. ხერხემალი „ქრება“, ამიტომ 60-70 წლის ადამიანები უფრო დაბლდებიან. ეს „სიბერის“ გამო არ ხდება. პოლ ბრეგი, ცნობილი ამერიკელი დიეტოლოგი თავის წიგნში „ჯანმრთელი ხერხემალი“ წერს: „ჩვენ ზარმაცი და უგუნო ადამიანების ცივილიზაცია ვართ, უსიცოცხლო ხელოვნურ საკვებს ვჭამთ და უმეტესობა ჩვენგანი არა სპორტსმენი, არამედ გულშემატკივარია“. დრო არაა, რომ ცხოვრება უკეთესობისკენ შეცვალოთ? ხერხემლის დაგრძელებით ახალგაზრდობას ვახანგრძლივებთ. ალბათ, შეგინიშნავთ, რომ დილით თავს უკეთ გრძნობთ, ვიდრე საღამოს? ამის მიზეზი მხოლოდ დაღლილობა არაა. საქმე იმაშია, რომ დღის განმავლობაში ხერხემალი „ჯდება“. მეცნიერებმა დაადგინეს, რომ დილით ცოტა უფრო მაღალი ვართ, ვიდრე საღამოს. ზუსტად ასე, ახალგაზრდობაში უფრო მაღალი ვართ, ვიდრე სიბერეში, რადგან ხერხემალი არა მხოლოდ დღის განმავლობაში, არამედ წლიდან წლამდე მცირდება. რატომ ხდება ასე და რა გავლენას ახდენს ჩვენს ჯანმრთელობასა და განწყობაზე? ამის შესახებ Vivien გიამბობთ.
ადამიანების ძალიან მცირე რაოდენობა ცხოვრობს ისეთი წესით, რომლის დროსაც ხერხემალი ბუნებით მინიჭებულ ფუნქციებს ასრულებს, კერძოდ, ტვირთვის გაძლება, როცა ადამიანი დარბის, ხტუნავს, რაიმეს ისვრის, ცურავს, ცხენზე ჯირითობას და ა.შ. ადამიანების უმეტესობა დღის განმავლობაში ერთფეროვან მოძრაობას ასრულებს და ეს მოძრაობაც საკმარისი არაა. ორგანიზმი ძალიან ეკონომიურად მოწყობილია: უმოქმედო ორგანო ნაკლებ სისხლს იღებს, რაც ჟანგბადის და მკვებავი ნივთიერებების და მთელი პროცესების შენელებას გულისხმობს. მალთაშუა დისკების ხრტილების ამოცანა: ყველა სახის დარტყმის და რყევის ამორტიზაცია. ამისთვის მოქნილი და ელასტიური უნდა იყოს. თუ არაფერს აკეთებთ, რა საჭიროა მოქნილობა? ხრტილები იკუმშება, ბრტყელდება და მაგრდება და ყოველდღიურად აღდგენითი პროცესები უფრო დუნედ მიდის, ერთი სიტყვით, ბერდება. თუ მალთაშუა დისკები ბრტყელი და ტლანქია, მალები ერთმანეთს ეხახუნება და აწვება, რაც ტკივილს იწვევს. ხერხემლის შიგნით ზურგის ტვინი მდებარეობს და მისგან ნერვები ყველა ორგანოში გადის. სულ 31 წყვილი ნერვია: 8 კისრის, 12 გულმკერდის, 5 წელის, 5 გავის და 1 კუდუსუნის. ისინი ხერხემლის თაღების მიერ წარმოქმნილი ხვრელებიდან გადიან. როცა მალებს შორის მანძილი მცირდება, ნერვების გაჭყლეტყვა გარდაუვალია. არადა ყველა ნერვი სადღაც მიდის. გამოდის, როცა ხერხემალი მოკლდება ანუ მალები ერთმანეთს „აჯდება“, ტკივილი თავს იჩენს. თუ რთული ვითარება ხერხემლის დასაწყისში, კისრის ზონაშია – თავი გვტკივა, თუ ოდნავ ქვემოთ – მხედველობის გაუარესებაა მოსალოდნელი, გულმკერდის ზონაში – კუჭი, ღვიძლი და გული ცუდად ფუნქციონირებს, ცოტა ქვემოთ – ნაწლავები და თირკმლები, კიდევ ცოტა ქვემოთ – სასქესო ორგანოები. ადამიანი იტანჯება, ხან ერთ, ხან მეორე ექიმთან მიდის, ყველა თავის ნაწილში რაღაცას ნახულობს, ყველა დიაგნოზს სვამს. გამოდის, ადამიანს ათობით დაავადება აქვს. სინამდვილეში დამნაშავე ხერხემელია. ზოგჯერ არის შემთხვევები, როცა ექიმები ვერაფერს ხედავენ, მაგრამ ადამიანი თავს დანგრეულად გრძნობს. პრობლემა ისევ ხერხემალშია.
გიზიარებთ პოლი ბრეგის რამდენიმე მარტივ ვარჯიშს, რომლებიც კომპლექსურად უნდა შეასრულოთ, რომ ხერხემლის და მთელი ორგანიზმის ჯანმრთელობა შეინარჩუნოთ.
- ეს ვარჯიში ხერხემლის იმ ნაწილზე ახდენს გავლენას, რომელიც თავს და თვალის კუნთებს „ემსახურება“, ასევე ნერვების ქსელს, რომელიც კუჭსა და ნაწლავებში გადის. ვარჯიშის შესრულებით გავლენას მოახდენთ ისეთ დაავადებებზე, როგორიცაა თავის ტკივილი, თვალის დაძაბულობა, კუჭის მოუნელებლობა და საკვების ცუდი ათვისება. იატაკზე სახით ქვემოთ დაწექით, მენჯი აწიეთ და ზურგი მოხარეთ. მხოლოდ ფეხის თითებს და ხელისგულებს დაეყრდენით. მუხლები და იდაყვები გამართული გქონდეთ. მენჯი თითქმის იატაკამდე დაუშვით. გახსოვდეთ, რომ ხელები და ფეხები გამართული უნდა იყოს, რაც ხერხემალს განსაკუთრებულ დაძაბულობას ანიჭებს. თავი ასწიეთ და მკვეთრად უკან გადაწიეთ. ვარჯიში ნელა შეასრულეთ. მენჯი რაც შეიძლება ქვემოთ დაუშვით, შემდეგ რაც შეიძლება მაღლა ასწიეთ, ზურგი ზემოთ მოხარეთ, კვლავ დაუშვით, ასწიეთ და დაუშვით. თუ ვარჯიშს სწორად შეასრულებთ, რამდენიმე მოძრაობის შემდეგ შვებას იგრძნობთ, ასე ხერხემლის მოდუნება ხდება.
- ვარჯიში განკუთვნილია ღვიძლსა და თირკმლებში მიმავალი ნერვების სტიმულირებისთვის. საწყისი პოზა ზუსტად ისეთი, როგორც პირველი ვარჯიშის დროს. იატაკზე სახით ქვემოთ დაწექით, მენჯი ასწიეთ და ზურგი მოხარეთ. ტანი მხოლოდ ხელისგულებს და ფეხის თითებს ეყრდნობა. ხელები და ფეხები გამართულია. მენჯი რაც შეიძლება მარცხნივ მოატრიალეთ, მარცხენა გვერდი რაც შეიძლება ქვემოთ დაუშვით, იგივე მეორე მხარეს გაიმეორეთ. ხელები და ფეხები არ მოხაროთ. ნელა შეასრულეთ და ხერხემლის გაწელვაზე იფიქრეთ.
- ხერხემლის სვეტის მოდუნებით მენჯის ზონაში სტრესს შეამცირებთ. ხერხემლისკენ მიმავალი კუნთები ძლიერდება, მალთაშუა დისკები სტიმულირდება. საწყისი პოზა: იატაკზე დაჯექით, ტანს ოდნავ უკან გამართულ ხელებს დაეყრდენით, ფეხები მოხრილი. მენჯი ასწიეთ. ტანი მოხრილ ფეხებს და გამართულ ხელებს ეყრდნობა. ვარჯიში სწრაფად შეასრულეთ. ტანი ხერხემლის ჰორიზონტალურ მდგომარეობაში აწიეთ. საწყის პოზას დაუბრუნდით. რამდენჯერმე გაიმეორეთ.
- ვარჯიში განსაკუთრებულ ძალას ანიჭებს ხერხემლის იმ ნაწილს, სადაც კუჭისკენ მიმავალი ნერვები მდებარეობს. მთელი ხერხემლისთვის ეფექტურია, წელავს, ორგანიზმს დაბალანსებულ მდგომარეობას უბრუნებს. ზურგზე დაწექით, ფეხები გამართეთ, ხელები გვერდებზე გაშალეთ. მუხლები მოხარეთ, მკერდთან მიიტანეთ და ხელებით შემოხვიეთ. მუხლები და ბარძაყები მკერდს დააშორეთ, ამასთან ხელები არ გაუშვათ – ერთგვარი საქანელა გამოვა. ამავდროულად, თავი ასწიეთ და ნიკაპით მუხლზე შეხება სცადეთ. ასეთ პოზაში 5 წამით გაჩერდით.
- ერთ–ერთი ყველაზე მნიშვნელოვანი ვარჯიში ხერხემლის გასაწელად. მსხვილი ნაწლავისთვის შვება მოაქვს, მასზე მოქმედ ნერვებს სტიმულირებს. ოთხზე დადექით, გაიხსენეთ, როგორ აკეთებენ ამას ბავშვები. ამ პოზაში 5-7 წუთი იარეთ. ახლა წარმოიდგინეთ, რომ კატა ხართ: მენჯი მაღლა ასწიეთ, ზურგი მოხარეთ, თავი დაუშვით, გამართულ ხელებსა და ფეხებს დაეყრდენით. ამ პოზაში ოთახი მოიარეთ. ვარჯიშის შემდეგ სჯობს დაისვენოთ და დამატებითი გაწელვები შეასრულოთ. მაგალითად, ხელებით ძელს ჩამოეკიდეთ.
ვარჯიში მკაცრად ინდივიდუალურად შეასრულეთ. თავიდან თითოეული ვარჯიში 2–3–ჯერ შეასრულეთ. ყოველ მეორე დღეს ხუთამდე და მეტჯერ გაზარდეთ და მთელი პროგრამა ყოველდღე შეასრულეთ. როგორც კი, გაუმჯობესებას შენიშნავთ, შეგიძლიათ ვარჯიშების ნაკრები კვირაში 2–ჯერ შეასრულოთ, რომ მოქნილი ხერხემალი შეინარჩუნოთ. გაითვალისწინეთ, რომ წლების განმავლობაში ხერხემალზე ნეგატიური ცვლილებები ხდებოდა და მოკლე დროში ვერაფერს გამოასწორებთ. ჯანმრთელობა ფულს ჰგავს: სწრაფად იხარჯება და გამომუშავება რთულია.
