მთელ მსოფლიოში ადამიანების უმეტესობა საყრდენ–მამოძრავებელი აპარატის ზონაში წელის ტკივილს ყველაზე ხშირად უჩივის. სტატისტიკურად, ზრდასრული ადამიანების 85%–ს თავისი ცხოვრების ამა თუ იმ ეტაპზე წელის ტკივილი აწუხებს.

მოძრაობა ზურგის ტკივილის შემცირებაში დაგეხმარებათ

სასიხარულოა, რომ წელის მწვავე ტკივილის დროს პროგნოზი შესანიშნავია. საკუთარ თავზე სათანადო ზრუნვის პირობებში შემთხვევების 90%–ში მდგომარეობა რამდენიმე დღეში ან კვირაში უმჯობესდება.სწრაფად გამოჯანმრთელების და განმეორების პროფილაქტიკის გასაღები: იყავით მაქსიმალურად აქტიური და თანდათან აქტივობის დონე გაზარდეთ.წონიანი მტკიცებულება არსებობს, რომ წოლითი რეჟიმი უსარგებლოა და გრძელვადიან პერსპექტივაში შეიძლება მდგომარეობა გააუარესოს. ახლა ექიმების უმეტესობა ადამიანებს მოუწოდებენ, რომ წელის ტკივილის დროს მეტად იაქტურონ, რადგან ეს საუკეთესო ტკივილგამაყუჩებელია.მჯდომარე ცხოვრების წესიც ხერხემლის და ზურგის კუნთებს ასუსტებს. ამან შეიძლება ხერხემლის ნაკლები მხარდაჭერა და ხანგრძლივი ტკივილი გამოიწვიოს.მოძრაობა ზურგის ტკივილს ამცირებს, ოღონდ სწორი ფორმით. მოერიდეთ ვარჯიშებს, რომლებიც ზურგზე ძლიერ დატვირთვას ქმნიან.

რომელი ვარჯიში ავირჩიოთ? ნაწილობრივ დამოკიდებულია იმაზე, თუ რამდენად ძლიერია თქვენი ტკივილი. ყოველთვის სჯობს მკურნალი ექიმის რეკომენდაციები მოისმინოთ, სანამ წელის ტკივილის შესამცირებლად მძიმე ვარჯიშს შეასრულებთ.თქვენი სიმპტომები ვარჯიშის შესრულებისას არ უნდა გაძლიერდეს. ყოველთვის, როცა ახალ ვარჯიშს იწყებთ, მსუბუქ დისკომფორტს და ტკივილს ელოდეთ. ჯანმრთელობის აღდგენის და კუნთების გაძლიერებასთან ერთად ტკივილი და დისკომფორტი ქრება. თუ ვარჯიში იწვევს ზომიერ ან ძლიერ ტკივილს, რომელიც 15 წუთზე მეტხანს გრძელდება, ვარჯიში შეწყვიტეთ.Vivien გიზიარებთ რამდენიმე მარტივ ვარჯიშს, რომელთა დახმარებით წელის ტკივილის შემცირებას შეძლებთ. ექიმის თანხმობის შემდეგ ამ ვარჯიშებით ყოველდღიურ მტანჯველ ტკივილს მოიშორებთ და ჯანმრთელობის საერთო მდგომარეობას გააუმჯობესებთ.თითოეული ვარჯიში ყოველდღე, ზედმეტი ზეწოლის გარეშე, ნელა შეასრულეთ. საუკეთესო ეფექტის მისაღწევად ვარჯიშების ნაკრები დღეში 2-3-ჯერ შეასრულეთ.

ვარჯიშები ზურგის ტკივილის გასაქრობად

1. მუხლები მკერდთან

იატაკზე ზურგით დაწექით. ორივე მუხლი ერთდროულად მკერდისკენ მიწიეთ, სანამ ბარძაყების და წელის კომფორტულ დაჭიმულობას არ იგრძნობთ. მუხლების ქვეშ შეგიძლიათ ხელები მოათავსოთ ან მუხლებს ხელები შემოხვიოთ. ამ პოზაში ერთი ჩასუნთქვა–ამოსუნთქვა გაჩერდით. ვარჯიში 5-10-ჯერ გაიმეორეთ. თუ ერთდროულად ორივე ფეხის აწევა გიჭირთ, მორიგეობით სცადეთ.

2. წელის ბრუნვა

იატაკზე, ზურგით დაწექით, მუხლები მოხარეთ. ნელ–ნელა ორივე მუხლი ერთ მხარეს გადაწიეთ, მხრებით იატაკს დაეყრდენით. მუხლები იატაკზე რაც შეიძლება შორს დაუშვით ან სანამ წელის კომფორტულ დაჭიმვას არ იგრძნობთ. ამ პოზაში ერთი ჩასუნთქვა–ამოსუნთქვა გაჩერდით. თითოეულ მხარეს 5-ჯერ გაიმეორეთ.

3. კობრა

მყარ ზედაპირზე მუცლით დაწექით. ტანის ზედა ნაწილი ასწიეთ, ხელებით (ან იდაყვებით, თუ ძალიან გიჭირთ) იატაკს დაეყრდენით. მენჯი იატაკს მიაბჯინეთ და ფეხები მოადუნეთ. ამ პოზაში ერთი ჩასუნთქვა–ამოსუნთქვა გაჩერდით, შემდეგ საწყის პოზას დაუბრუნდით. ვარჯიში 5-10-ჯერ გაიმეორეთ.

4. ემბრიონის პოზა

ოთხზე დადექით, შემდეგ უკან გადაიხარეთ, რომ ქუსლებზე დაჯდეთ. ხელები თქვენ წინ გაშალეთ, ხელისგულები იატაკს დაადეთ. თავი და მკერდი ქვემოთ დაუშვით. ხელები რაც შეიძლება შორს გაწელეთ. ამ პოზაში ჩაიძირეთ, წელის და იღლიების დაჭიმვა იგრძენით. ამ პოზაში ერთი ჩასუნთქვა–ამოსუნთქვა გაჩერდით, შემდეგ საწყის პოზას (ოთხზე დადექით) დაუბრუნდით. ვარჯიში 5-ჯერ გაიმეორეთ.

5. მენჯის დახრა

ზურგზე დაწექით, ფეხები მუხლებში მოხარეთ და ტერფები იატაკს მიაბჯინეთ. წელი მოადუნეთ, ნეიტრალურ პოზაში გააჩერეთ (ანუ წელში მსუბუქი მოხრა უნდა იგრძნოთ, თუ ზურგის ქვეშ ხელს შეაცურებთ). შემდეგ წელი გამართეთ და იატაკს მიაბჯინეთ, მუცლის და ბარძაყის კუნთები დაჭიმეთ, მენჯი ოდნავ ზემოთ ასწიეთ. ამ პოზაში 10 წამით გაჩერდით. 5-10-ჯერ გაიმეორეთ.