სარეცხის საპონმა ჩვენამდე საბჭოთა კავშირის დროიდან მოაღწია, როდესაც ის ერთადერთ სარეცხ საშუალებად ითვლებოდა. მიუხედავად იმისა, რომ დეფიციტის დრო დიდი ხანია წარსულს ჩაბარდა და მაღაზიის თაროებზე უამრავი სარეცხი საშუალებაა წარმოდგენილი, ნაცნობი ყავისფერი საპონი მაინც არის ყველა სახლში. მიუხედავად იმისა, რომ ეს პროდუქტი ჩვენთვის დიდი ხანია ნაცნობია, გეტყვით, რომ იგი შეიძლება გამოყენებულ იქნას არა მხოლოდ სარეცხისთვის. ყოფაცხოვრებაში მას უამრავი მიზნით გამოიყენებენ.
ჩემს ბავშვობაში სახლში საყოფაცხოვრებო საპონი ყოველთვის გვქონდა. თანაც ძალიან ბევრი, დაახლოებით ერთი ყუთი. მეგონა, რომ ის არასოდეს გამოილეოდა. რადგან იმ დროისთვის უკვე იყიდებოდა სარეცხის სურნელოვანი საშუალებები, ჩემთვის სრულიად გაუგებარი იყო, რა საჭირო იყო საყოფაცხოვრებო საპონი, თავისი სპეციფიკური არომატით. ამ კითხვით ბებიას მივმართე, მან კი მიპასუხა, რომ ხარისხით ვერც ერთი სარეცხი საშუალება ვერ შეედრებოდა საყოფაცხოვრებო საპონს. ამავდროულად ის მხოლოდ სარეცხის გასარეცხად არ გამოიყენება. თუმცა ამ ყველაფერს მე მხოლოდ ზრდასრულ ასაკში მივხვდი. ეს საშუალება მართლაც უნივერსალურია.
საყოფაცხოვრებო საპნის გამოყენება სხვა მიზნებისთვის
საყოფაცხოვრებო საპნის 72%-ს შეადგენს ცხიმები, ასევე მის შემადგენლობაშია ტუტეები, რომელთა pH დონე არ აღემატება 12. ეს არის ის რაოდენობა, რომელიც მაქსიმალურ დასაშვებად ნორმად ითვლება ჩვენი კანისთვის. ტუტე პასუხისმგებელია საპნის რეცხვის უნარზე, ის კლავს ბაქტერიებს და აშორებს ჭუჭყს სხვადასხვა ზედაპირიდან. და რადგან საპონი მზადდება ცხოველური და მცენარეული ცხიმებისგან, ის არ იწვევს ალერგიას ან კანის გაღიზიანებას. საპონი ძვირი არ ღირს და ამიტომ ყოველთვის უნდა გვქონდეს მისი მარაგი.
საყოფაცხოვრებო საპნის გამოყენება ალტერნატიული გზით
გარდა თავისი პირდაპირი ფუნქციისა, ეს საპონი ასევე შეიძლება სასარგებლო იყოს სხვადასხვა ცხოვრებისეულ სიტუაციებში.
როცა ელვა იჭედება
ჩანთაზე ან ტანსაცმელზე ახალი ელვა შეიძლება ხშირად გაიჭედოს. ამას ნამდვილად ახლავს გარკვეული დისკომფორტი. გარდა ამისა, არსებობს მისი გატეხვის რისკი, როდესაც მის შეკვრას ვცდილობთ. ამ შემთხვევაში საყოფაცხოვრებო საპონი დაგვეხმარება. საკმარისია ელვა საპნიანი წყლით დავამუშაოთ და ის ადვილად და მარტივად შეიკვრება.
სახლის დასუფთავებისთვის
გარდა იმისა, რომ საყოფაცხოვრებო საპონი შესანიშნავად აშორებს ლაქებს ქსოვილებიდან, ის ასევე კარგად უმკლავდება ზედაპირებზე არსებულ ჭუჭყს. ცხიმის, ჭუჭყის, ნადების და სხვა ლაქების მოშორება შესაძლებელია საპნით. ეს ხდება იმავე ტუტეს წყალობით. ძველი ლაქებიც კი გაქრება, თუ მათ სარეცხი საპნით კარგად აქაფებულ ღრუბელს გადაატარებთ.
კარის ხმაურისას
თუ კარი ხმაურობს, ზეთი უნდა წაუსვათ. მაგრამ თუ ის არ გაქვთ, მაშინ სიტუაციას საყოფაცხოვრებო საპონი გამოასწორებს. საკმარისია მისი წასმა კარის ანჯამებზე (პეტლებზე) და უსიამოვნო ხმა გაქრება
ხელის დეზინფექციისთვის
თუ თქვენ უნდა იმუშაოთ ნივთიერებებთან, რომლებიც აღიზიანებს კანს ან ბასრ საგნებთან, ხელები საჭიროებს დაცვას. საყოფაცხოვრებო საპონს შეუძლია უზრუნველყოს იგი. საქმის დაწყებამდე ხელებზე კარგად უნდა წაისვათ საპონი და გააშროთ დაბანის გარეშე. საპონი შექმნის დამცავ ფენას. ასე რომ, ნაკაწრის ან გაჭრის შემთხვევაშიც კი, მიკრობები არ მოხვდება ჭრილობაში.
სოკოს საწინააღმდეგოდ
მის შემადგენლობაში შემავალი ტუტეების წყალობით, საყოფაცხოვრებო საპონი კარგად უმკლავდება ობის და სხვა სოკოებს. მაშინაც კი, თუ სპეციალური პროდუქტები არ იძლევა მოსალოდნელ შედეგს, საპნის გამოყენებით შესაძლებელია ამის გამოსწორება. უბრალოდ კარგად გააქაფეთ ღრუბელი, წაუსვით ქაფი კედელზე ან ჭერზე არსებულ სოკოს ლაქებს და დატოვეთ რამდენიმე წუთის განმავლობაში. ამის შემდეგ, ჩამორეცხეთ დარჩენილი საპონი სუფთა წყლით. საშუალება გაუმკლავდება არსებულ პრობლემას და ხელს შეუშლის მის დაბრუნებას.
სარკის დაორთქვლის თავიდან ასაცილებლად
წყლის პროცედურების დროს აბაზანის სარკის დაბურვის თავიდან ასაცილებლად გამოიყენეთ საყოფაცხოვრებო საპნის ქაფი. ჯერ სარკე გაწმინდეთ ჩვეულებისამებრ, შემდეგ კი ზედაპირზე წაუსვით საპნის ქაფი. საპნის ჩამორეცხვის გარეშე, სარკე ქაღალდის პირსახოცით გააშრეთ. ეს შექმნის ფირს, რის გამოც ზედაპირზე კონდენსატი არ დაგროვდება.
ბაღის მავნებლების საწინააღმდეგოდ
ბაღში მავნებლებს შეუძლიათ არა მხოლოდ განწყობა გაგიფუჭონ, არამედ გაანადგურონ მოსავალი ან ზიანი მიაყენონ მცენარეებს. საყოფაცხოვრებო საპონი ბუგრების, ობობას ტკიპებისა და სხვა მწერების მოშორებაში დაგეხმარებათ. გახეხეთ საპონი, შეურიეთ თბილ წყალს და დაელოდეთ სანამ წყალში მთლიანად არ გაიხსნება. ეს ხსნარი შეიძლება გამოყენებულ იქნას როგორც ბაღის კულტურების, ასევე სახლის მცენარეების დასამუშავებლად. საპონი არცერთ მათგანს არ დააზარალებს.
ვიმედოვნებთ, რომ ჩვენი რჩევები თქვენთვის სასარგებლო აღმოჩნდება.
