ექიმი რუსტემ სადიკოვი: არ უნდა დალიოთ ჩამოსხმული წყალი, თუ ის დიდი ხნის განმავლობაში იყო მზის ქვეშ – ასეთმა სითხემ შეიძლება მოწამვლაც კი გამოიწვიოს.
არ უნდა დალიოთ მზის ზემოქმედების ქვეშ დატოვებული ბოთლში ჩასმული წყალი, ისევე როგორც არ უნდა მიირთვათ მაცივარში დაუდგმელი საკვები სიცხეში – ის ფუჭდება და ზიანს აყენებს ორგანიზმს. ექიმმა სადიკოვმა თქვა, რომ ულტრაიისფერი სხივების ზემოქმედების ქვეშ მოთავსებულ პლასტმასის ბოთლში წყალმა შეიძლება შეიცვალოს შემადგენლობა და გახდეს სასმელად უვარგისი.
„დიდი შეცდომაა პლასტმასის ბოთლში წყლის ტარება და მზეზე დატოვება. და კიდევ უფრო მეტიც, არ უნდა იყიდოთ წყალი ქუჩის მოვაჭრეებისგან – უცნობია რამდენ ხანს იდგა იგი სიცხეში, სანამ მაცივარში შედგამდნენ“, – განაცხადა სპეციალისტმა.
მისი განმარტებით, პლასტმასის ბოთლში წყალი მზის ქვეშ 2-3 საათზე მეტ ხანს არ უნდა დარჩეს.
რუსტემ სადიკოვმა ხაზგასმით აღნიშნა, რომ მზემ შეიძლება უარყოფითად იმოქმედოს წყალზე, იმისდა მიუხედავად, ჩამოსხმულია თუ ჭაბურღილიდან ამოღებული. სპეციალისტმა ივარაუდა, რომ ულტრაიისფერი გამოსხივების „წყალობით“ წყლის შემადგენლობა შეიძლება შეიცვალოს და ის დასალევად უვარგისი გახდეს. არსებობს კვლევა, რომელიც აჩვენებს, რომ ჩამოსხმულ წყალზე მზის სხივების ზემოქმედება იწვევს მასში მძიმე მეტალების გამოყოფას.
„მზის ზემოქმედების ქვეშ შეიძლება გაფუჭდეს წარმოებაში ყველა სანიტარიული სტანდარტის დაცვით ჩამოსხმული წყალიც კი. და თუ თქვენ თვითონ ასხამთ წყალს ფილტრიდან გამჭვირვალე ბოთლში, განსაკუთრებული სიფრთხილე გმართებთ“, – თქვა ექსპერტმა.
ექიმი თვლის, რომ უმჯობესია თან ატაროთ წყალი გაუმჭვირვალე ბოთლებში ან სპეციალურ თერმოსებში.
მნიშვნელოვანია! ინფორმაცია მოწოდებულია საცნობარო მიზნებისთვის. უკუჩვენებებისა და გვერდითი მოვლენების შესახებ ჰკითხეთ სპეციალისტს და არავითარ შემთხვევაში არ ჩაიტაროთ თვითმკურნალობა. დაავადების პირველი ნიშნების გამოვლენისას მიმართეთ ექიმს.
