ალბათ, თითოეულ ჩვენგანს ცხოვრებაში ერთხელ მაინც შეჰქმნია ისეთი უსიამოვნო სიტუაცია, როგორიც არის გაჭედილი უნიტაზი. მსგავსი პრობლემა თითქმის ყოველთვის უდროოდ ხდება და თან არაერთი უხერხულობა მოაქვს. ვივიენის დღევანდელ სტატიაში ვისაუბრებთ მილების გაწმენდის ყველაზე ეფექტურ მეთოდებზე, იმ შემთხვევისთვის თუ უნიტაზი გაიჭედება.
ხშირად, დამალული საფრთხის ნიშნებია სუსტი გადინება, ამღვრეული წყალი ნარჩენებით ან წყლის აწევა ღილაკზე დაჭერის შემდეგ. თუ მაინც გამოტოვეთ ეს მომენტი, არ მიეცეთ სასოწარკვეთას! უნიტაზის გაწმენდა შეგიძლიათ სანტექნიკის ან დგუშის დახმარების გარეშეც. ხშირად ასეთ სიტუაციებში გამოიყენებენ ყველაზე გავრცელებულ საშუალებებს.
რა შეიძლება იყოს უნიტაზის გაჭედვის მიზეზი?
ეს შეიძლება გამოწვეული იყოს მრავალი მიზეზით: გამოყენების შეცდომებიდან დაწყებული სანტექნიკის არასწორად დაყენებამდე. ქვემოთ განვიხილავთ ძირითად ფაქტორებს, რომლებიც გავლენას ახდენს უნიტაზის ბლოკირებაზე:
- სარემონტო სამუშაოების შედეგები (ცემენტის ნარჩენები, სამშენებლო ნაგავი და მტვერი);
- სანიაღვრე მილების არასწორი ზომა;
- სანიაღვრე მილის დახრილობის შეუსაბამო კუთხე;
- ხელსახოცები, საფენები;
- იატაკის ჩვრები, ღრუბლები ან სხვა ქსოვილები;
- საკვების ნარჩენები, ჩაის ფოთლები ან კონსერვები;
- შემავსებელი კატის უჯრისთვის;
- ტუალეტის ქაღალდი დიდი რაოდენობით.
ეს ყველაფერი გროვდება ტუალეტის მილში, რაც იწვევს სანტექნიკის თანდათანობით ბლოკირებას. მიზეზები გავარკვიეთ, მაგრამ როგორ გავწმინდოთ უნიტაზი?
გაჭედილი უნიტაზი: 5 გზა საცობის გასაწმენდად დგუშის გარეშე
საბედნიეროდ, უნიტაზის გაწმენდა არც ისე რთულია. ყველაზე სერიოზული საცობიც კი ადვილად შეიძლება აღმოიფხვრას იმ საშუალებებით, რაც ყველას აქვს სახლში. როგორც წესი, ასეთი შემთხვევებისთვის გამოიყენება დგუში. თუმცა, როგორ უნდა მოვიქცეთ, თუ ის არ გვაქვს? ჩვენ შევკრიბეთ 5 ეფექტური მეთოდი მილების გასაწმენდად სანტექნიკური ხელსაწყოების გარეშე.
ცხელი წყალი და ჭურჭლის სარეცხი საშუალება
ჩაასხით ქვაბში ცხელი წყალი (არა მდუღარე!). ასწიეთ ქვაბი და ნელ-ნელა ჩაასხით უნიტაზში. რაც არ უნდა უცნაურად ჟღერდეს, წყლის წნევა ბლოკირებას მნიშვნელოვნად ამცირებს. თუ ეს არ უშველის, უნიტაზში ჩაასხით ცოტაოდენი თხევადი ჭურჭლის სარეცხი საშუალება. წყალი საპნიანი გახდება, რამაც საცობიც სრიალა უნდა გახადოს. დაელოდეთ 20-30 წუთის განმავლობაში. ამის შემდეგ რამდენჯერმე ჩარეცხეთ უნიტაზი.
ძმარი და საკვები სოდა
უნიტაზში ჩაყარეთ 1 ს.კ. საცხობი სოდა. შემდეგ დაასხით 50-100 მლ ძმარი. მიიღებთ შუშხუნა ქიმიურ რეაქციას. დაელოდეთ სანამ ქაფი შეჩერდება. შემდეგ უნიტაზში 1 ლიტრი ცხელი წყალი ჩაასხით და ჩარეცხეთ.
ტუალეტის ჯაგრისი
თუ სახლში დგუში არ გაქვთ, გამოიყენეთ ჩვეულებრივი ტუალეტის ჯაგრისი. ჩადეთ იგი უნიტაზის ხვრელში და ამოძრავეთ ზევით და ქვევით. ასეთი ქმედებები გაანადგურებს საცობს, რამაც გამოიწვია უნიტაზის გაჭედვა. თუ ჯაგრისის გაფუჭება არ გსურთ, გამოყენებამდე შეფუთეთ იგი ცელოფნით.
მავთულის საკიდი
აიღეთ ჩვეულებრივი მავთულის საკიდი და მავთულის მაგვარ რამედ გადააქციეთ. მიღებული მავთული ფრთხილად მოათავსეთ უნიტაზის სანიაღვრეში და სხვადასხვა მიმართულებით ატრიალეთ. იყავით ძალიან ფრთხილად, რომ არ დააზიანოთ ხელი ან არ დაკაწროთ ტუალეტის საფარი.
გაზიანი წყლის ბოთლი
ამ მეთოდისთვის დაგჭირდებათ რეზინის ხელთათმანი, რადგან ხელების უნიტაზში ჩაყოფა დაგჭირდებათ. შეავსეთ 2 ლიტრიანი ბოთლი ცხელი წყლით. წყლის დაღვრა თავიდან რომ აიცილოთ, ბოთლს პირზე ცერა თითი დააჭირეთ და ისე ჩაუშვით უნიტაზში. შემდეგ, მოაშორეთ ცერა თითი და დაიწყეთ ბოთლის მჭიდროდ შეკუმშვა. ცხელი წყალი და წნევა, სავარაუდოდ, საცობს მოაშორებს.
მათთვის, ვისაც “ველოსიპედის გამოგონება” არ უყვარს, საუკეთესო ვარიანტია სანტექნიკის გასაწმენდი სპეციალური საშუალებები. ისინი იაფია, საკმაოდ ეფექტური და შესაფერისია სხვადასხვა ტიპის მილებისთვის. ამასთან, მათი არჩევისას ყურადღებით იყავით: ტუტესა და მჟავას შემცველი პროდუქტები შეიძლება საზიანო იყოს.
