ზაფხულში უძილობის მთავარი მიზეზი სიცხეა, რომელიც ქალაქს ღამითაც არ ეშვება. სინოპტიკოსების პროგნოზით, წელს ძალიან ცხელი ზაფხული გვაქვს, ამიტომ Vivien გიზიარებთ რამდენიმე რჩევას, როგორ გამოიძინოთ სრულფასოვნად ზაფხულში.
ხარისხიანი ძილისთვის ოპტიმალური ტემპერატურაა 18-21 გრადუსი. თუ საძინებელ ოთახში უფრო მაღალი ტემპერატურაა, მძინარე ადამიანი ოფლიანობს, სუნთქვა და გულისცემა ხშირდება, რაც ძილს წყვეტილს და მოუსვენარს ხდის. დილით ცუდი განწყობით და დაღლილი იღვიძებს. ზაფხულის ცხელ ღამეშიც კარგად რომ გამოიძინოთ და დაისვენოთ, მარტივი წესები სცადეთ.
საცვალი სწორად შეარჩიეთ
ბამბა და სელი ჰაერს და ტენს ყველაზე უკეთ ატარებს. თუნდაც გაოფლიანდეთ, სწორად შერჩეული საცვალი „სათბურის ეფექტს“ თავიდან აგაცილებთ. სინთეტიკური ლეიბისპირი და ბალიშისპირი ბამბით ან სელით ჩაანაცვლეთ.
კონდიციონერი სწორად გამოიყენეთ
სასწაული მოწყობილობა სიცხეს სწრაფად და ეფექტურად უმკლავდება. კარგად რომ დაიძინოთ, ღამით ჩვეულებრივზე რამდენიმე გრადუსით დაბალი ტემპერატურა დააყენეთ. ოღონდ ზედმეტი არ მოგივიდეთ. კონდიციონერის ქვეშ ადვილად შეიძლება გაცივდეთ. სიცხეში სურდოს არავის უსურვებთ. აკონტროლეთ, რომ ტემპერატურა თქვენთვის კომფორტულ ნიშნულს არ ჩამოსცდეს.
როგორც ვარიანტი, ჰაერის დამატენიანებელი გამოიყენეთ.
ფიზიკური დატვირთვა სწორად გაანაწილეთ
აქტიური ვარჯიში სისხლში ენდორფინების კონცენტრაციას ზრდის. ეს ნივთიერება ატონიზირებს ნერვულ სისტემას, ამიტომ საღამოს სირბილის ან მძიმე ფიზიკური ვარჯიშის შემდეგ დაძინება რთულდება. უმჯობესია, თუ ძილის წინ სუფთა ჰაერზე გაისეირნებთ, იოგით ან მედიტაციით დაკავდებით.
ბევრი არ ჭამოთ
ნათელია, რომ ძალიან ნოყიერი ვახშამი სწრაფად დაძინებას ხელს უშლის. აი, საღამოს დაბალკალორიული წახემსება საპირისპირო მოქმედებას ახდენს. ცოტა ხაჭო ან ბოსტნეულის სალათი მუცელში სიმძიმეს არ იწვევს, მაგრამ სისხლს აგზავნის ტვინიდან კუჭში და დაძინებას ამარტივებს.
სიბნელეზე იზრუნეთ
მელატონინი მთავარი ჰორმონია, რომელიც სრულფასოვან ძილს უზრუნველყოფს. ის მხოლოდ სიბნელეში იწარმოება. დახშულ სინათლესაც მელატონინის სინთეზის შემცირება შეუძლია, ამიტომ ღამის სანათზე და ტორშერზე უარი თქვით, სქელი ფარდა ჩამოაფარეთ, რომ ზაფხულის ნაადრევმა განთიადმა თქვენს ძილს ხელი არ შეუშალოს. განსაკუთრებით საზიანოა სმარტფონის ან პლანშეტის გამოყენება საწოლში. დამტკიცებულია, მისი გამოსხივების სპექტრი მელატონინის სინთეზს ხელს უშლის.
რა გავაკეთოთ, თუ ძილი მაინც არ გვეკარება?
მუდმივი სტრესი, რომელიც თანამედროვე ადამიანის ცხოვრებას თან ახლავს, ზოგჯერ ნერვული სისტემის მუშაობას იმდენად არღვევს, რომ სამედიცინო ჩარევის გარეშე ძილის და სიფხიზლის ნორმალური ბიოლოგიური რითმის აღდგენა შეუძლებელი ხდება. ექიმს უნდა მიმართოთ, თუ ამჩნევთ, რომ კვირაში მინიმუმ 3–ჯერ:
- ნახევარი საათის განმავლობაში ვერ იძინებთ.
- ღამით რამდენჯერმე იღვიძებთ.
- დაღლილი იღვიძებთ.
თანამედროვე ფარმაკოლოგიური პრეპარატები უძილობის რთული ფორმების გამკლავებაშიც დაგეხმარებათ. ხშირად ნერვული სისტემის ნორმალური მუშაობის აღსადგენად სპეციალური მკურნალობაა საჭირო. კონსულტანცია გაიარეთ ექიმთან, რომელიც უძილობის აღმოსაფხვრელად ეფექტურ მედიკამენტურ და არამედიკამენტურ მეთოდებს დაგინიშნავთ.
