ჩემთვის ხრაშუნა და წვნიანი კომბოსტოს მწნილი ცივ სეზონზე ვიტამინების სტრატეგიული მარაგია. 30 წელზე მეტია ერთ რეცეპტს ვიყენებ, რომელსაც არასდროს უღალატია. კომბოსტო წვნიანი გამოდის, თითქოს ბაზარში ბებიასთან ვიყიდე. სიტყვაზე, ევგენი კლოპოტენკოც ამ პრინციპით ამწნილებს. Vivien გიზიარებთ შესანიშნავ მეთოდს, როგორ დაამწნილოთ კომბოსტო ზამთრისთვის. გემრიელია, როგორც ბაზარში ნაყიდი!
ინგრედიენტები სამლიტრიანი ქილისთვის:
- 1,5 ლ წყალი
- 2-2,5 კგ კომბოსტო
- 1 სტაფილო
- 2 ს/კ მარილი
- 3 დაფნის ფოთოლი
მომზადების წესი:
- ზამთრის ჯიშის კომბოსტო აირჩიეთ. ასეთი კომბოსტო მეტ შაქარს შეიცავს, ხოლო მისი ფოთლები მჭიდრო და მკვრივია. კომბოსტო გარეცხეთ, მყარი ზედა ფურცლები და შუაგული მოაშორეთ.
- სტაფილო გარეცხეთ, გათალეთ და გახეხეთ. კომბოსტო შუაზე ან ოთხად გაჭერით და ერთი ნაწილი დანით წვრილად დაჭერით, მეორე ნაწილი გახეხეთ. კომბოსტოს სახეხი გამოიყენეთ, ასე ზომის გაკონტროლება არ მოგიწევთ.
- კომბოსტო და სტაფილო აურიეთ, დაფნის ფოთლები დაუმატეთ. ბოსტნეული სუფთა მინის ქილაში გადაიტანეთ, კარგად ჩატუმბეთ, რომ სიცარიელე არ დარჩეს.
- ცალკე 1,5 ლ მდუღარე წყალი და მარილი აურიეთ. მარილი წყალში უნდა გაიხსნას. ბებია ამ ნარევში 1 ს/კ თაფლის დამატებას მირჩევდა. მარილწყალს გაცივება აცადეთ, შემდეგ კომბოსტოს დაასხით. კომბოსტოს ქილა ღრმა თასში ჩადეთ. ეს საჭიროა იმ შემთხვევისთვის, თუ მარილწყალი გადმოღვრას დაიწყებს. კომბოსტოს ქილა ქურის მახლობლად ან ნებისმიერ თბილ ადგილას დადეთ. ნახვრეტიანი თავსახური ან მარლა დააფარეთ, რომ კომბოსტო „სუნთქავდეს“.
- მეორე დღეს ხის წვრილი ჯოხით ან შამფურით კომბოსტო დაჩხვლიტეთ. ასე ქილიდან ჰაერს გამოდევნით, რომელიც დუღილისას წარმოიქმნება. ქაფი, რომელიც მარილწყლის ზედაპირზე წარმოიქმნა, მოაშორეთ, სანამ დუღილის პროცესი არ დასრულდება.
- კომბოსტო 24 საათის შემდეგ შეგიძლიათ გასინჯოთ. 3 დღეში სრულად მზად იქნება. მაცივარში შეინახეთ. გემრიელად მიირთვით.
ხრაშუნა კომბოსტოს მწნილი თქვენი მხსნელი გახდება, როცა საყვარელ გარნირთან ან ხორცთან გემრიელი წასახემსებელი დაგჭირდებათ. ასეთი კომბოსტო აივანზე გაზაფხულამდე შეგიძლიათ შეინახოთ, მაგრამ, სავარაუდოდ, მალე გაქრება. ძალიან გემრიელი გამოდის. შესანიშნავი რეცეპტია, გირჩევთ სცადოთ!
