ყაბაყის სეზონზე ბოსტნეულის რაგუს ხშირად ვამზადებ. ჩემი საფირმო საზაფხულო კერძია. რაგუ ყაბაყით ნოყიერი და მსუბუქი გამოდის, თუ კარტოფილს არ დაუმატებთ. შარშან ყაბაყის კონსერვები ზამთრისთვის შევინახე, რადგან სეზონზე ბოსტნეულს ფასი არ აქვს, მაგრამ ზამთარში ძვირდება. როგორ გავყინოთ ყაბაყი? Vivien გიზიარებთ ყაბაყის შენახვის სხვადასხვა მეთოდს იმის მიხედვით, თუ რისთვის გჭირდებათ.

როგორ გავყინოთ ყაბაყი

დეიდა აგარაკზე ყაბაყს ზრდის და სეზონზე რამდენიმე კილოგრამ ახალ ბოსტნეულს ყოველთვის მიგზავნის. ყველაზე გემრიელი მაშინაა, როცა შიგნით თესლი არ აქვს და ქერქი რბილია. ასე ჩვენს ოჯახში ყაბაყის კვირეული იწყება, რადგან ნაწილს ზამთრისთვის ვყინავ, ნაწილს მაშინვე მოვიხმარ: მობრაწულა, ოლადი, შემწვარი ყაბაყი და სხვადასხვა გემრიელობა, რომელსაც ზამთარ–ზაფხულ სიამოვნებით მივირთმევთ.

რგოლებად დაჭრილი ყაბაყი – ყაბაყი წყლიანი რომ არ იყოს, ცხელ წყალში რამდენიმე წუთით გააჩერეთ. ასე გალღობილი ყაბაყი შეწვისას წყლიანი არ იქნება. ამ მეთოდით არ მიცდია, უბრალოდ ახალ ყაბაყს თესლის გარეშე ვყინავ. სქელქერქიან ძველ ყაბაყს ფოროვანი სტრუქტურა აქვს. სწორედ ასეთი ბოსტნეული რეზინას გვახსენებს. სწორედ ამიტომ, გასაყინად მხოლოდ ახალ დაკრეფილი ბოსტნეული გამოიყენეთ. სანამ გაყინავთ ყაბაყი ცივ წყალში კარგად გარეცხეთ. თუ მაღაზიაში ნაყიდი ყაბაყია, ჯერ სოდით გარეცხეთ, შემდეგ სუფთა წყლით. თითოეული ყაბაყი პირსახოცით გაამშრალეთ და დაჭრა დაიწყეთ. ყაბაყი შესაწვავად 1-1,5 სმ სისქის რგოლებად დაჭერით. დიდ საჭრელ დაფას პარკი გადააფარეთ და რგოლები ერთ რიგად დააწყვეთ ისე, რომ ერთმანეთს არ ეხებოდეს. ზემოდან პარკი დააფარეთ და ყაბაყის მორიგი რიგი დააწყვეთ. ასე ყაბაყი ერთმანეთს არ მიეკვრება და პარკს ადვილად მოაშორებთ. 3-4 რიგი შეგიძლიათ გააკეთოთ, ყაბაყი გაყინოთ, შემდეგ ერთ ჰერმეტულ კონტეინერში შეინახოთ ან პაკეტებში შეფუთოთ. თუ თეფშს ან დაფას პარკს არ დააფარებთ, ყაბაყი მიეკვრება და რთულად მოშორდება. ყაბაყის რგოლები შეგიძლიათ დაუმატოთ ბოსტნეულის მობრაწულას ან ტაფაზე შეწვათ. წინასწარ გალღობა არ სჭირდება. მობრაწულაში, წვნიანში დანარჩენ ბოსტნეულს დაუმატეთ ან მაშინვე მზესუმზირის ზეთში შეწვით.

კუბებად დაჭრილი ყაბაყი – რამდენიმე პაკეტი მოამზადეთ. წარმატებული ვარიანტია. კუბებად დაჭრილი ყაბაყი შეგიძლიათ დაუმატოთ რაგუს, გამოიყენოთ ომლეტში, მარილიან მაფინებში, პირველ კერძში. ყაბაყის კუბები მსხვილი ან წვრილი შეიძლება იყოს. 2 სმ საკმარისია, რომ ყაბაყმა ფორმა არ დაკარგოს და სწრაფად მომზადდეს. დაჭრილი ყაბაყი კვლავ პარკდაფარებულ დაფაზე დააწყვეთ და თითოეული ნაჭერი ერთმანეთს ცოტა დააშორეთ. მაშინვე ზიპ–პაკეტებში შეგიძლიათ ჩააწყვოთ, მაგრამ ასე ერთმანეთს მიეკვრება. უმჯობესია, წინასწარ გაყინოთ, შემდეგ გაანაწილოთ: 1 პაკეტში – 1 ულუფა ყაბაყი, რომ მათი გატეხვა არ მოგიწიოთ, თუ შეფუთვაში კონდენსაცია დაგროვდება და ყინულად გადაიქცევა. ძველი ყაბაყიც შეგიძლიათ გამოიყენოთ, მაგრამ წინასწარ თესლი და უხეში ქერქი მოაშორეთ.

გახეხილი ყაბაყი – ოლადებისთვის ნებისმიერი ყაბაყი თესლის გარეშე გამოგადგებათ. ყაბაყი მსხვილ სახეხზე გახეხეთ და კარგად გაწურეთ, რომ წვენი გამოვიდეს. ახლა გახეხილი ყაბაყი დაფაზე დადეთ და საყინულეში გაყინეთ. მაშინვე პაკეტებში შეგიძლიათ შეინახოთ ან სილიკონის ფორმებში გაანაწილოთ. მომზადების წინ გაალღვეთ და ცომს დაუმატეთ.

რედაქციის რჩევა – ყაბაყით ნახევრად მზა პროდუქტები შეგიძლიათ მოამზადოთ. მაგალითად, ყაბაყით ფარშირებული ნავები. ასეთი პროდუქტი ცალკე შეინახეთ და ფოლგაში გაახვიეთ. როცა მომზადებას მოისურვებთ, ღუმელი გააცხელეთ და ყაბაყი გამოაცხვეთ. გაყინული ყაბაყი დანამატების გარეშე 5 თვე შეგიძლიათ შეინახოთ. ხახვთან, სტაფილოსთან, ფარშთან ერთად გაყინული ყაბაყი საყინულეში მაქსიმუმ 2 თვე შეინახეთ. წარმატებულ მომზადებას და სასიამოვნო ზაფხულს გისურვებთ.