ფიზიკური აქტივობა გულის ჯანმრთელობის მხარდასაჭერად უკიდურესად მნიშვნელოვანია. გთავაზობთ ფიზიკური აქტივობის რამდენიმე სახეობას, რომელიც გულ–სისხლძარღვთა დაავადებების განვითარებას ხელს უშლის.დღეში 40 წუთი საშუალო ინტენსივობის ვარჯიშს დაუთმეთ. თუ მაღალი ინტენსივობის ვარჯიშები გიყვართ, პირველ ეტაპზე მწვრთნელთან ერთად შეასრულეთ. ზომიერი ინტენსივობის ვარჯიშებს მიეკუთვნება სწრაფი სიარული, ველოსიპედის ტარება, იოგა და ცურვა. ძუნძულით სირბილი და ჩოგბურთიც გამოგადგებათ. კარგ დატვირთვას უზრუნველყოფს უხეშ რელიეფზე ხანგრძლივი სიარული, როცა მთაზე ადიხართ და ამით სხეულის სხვადასხვა ნაწილში კუნთებს აძლიერებთ.
თუ 45 წელს გადაცილებული ხართ და რეგულარულად არ ვარჯიშობთ, პირველ რიგში, სამედიცინო გამოკვლევა ჩაიტარეთ. ამის შემდეგ ინტენსიური ვარჯიში მწვრთნელის მეთვალყურეობით დაიწყეთ. სხვადასხვა სარელაქსაციო მეთოდებით სტრესი შეამცირეთ. მაგალითად, იოგა ან მედიტაცია. ასე გულით სიკვდილიანობის რისკიც მცირდება. ქალებს მენოპაუზის შემდეგ და კაცებს 45 წლის ასაკში ერთნაირი უპირატესობა აქვთ, რომ რეგულარული ვარჯიშით გულის დაავადებების განვითარების რისკი შეამცირონ.
რატომ ხდება ასე? საქმე იმაშია, რომ ვარჯიში არა მხოლოდ ხელების და ფეხების კუნთებს, არამედ სხეულის მთავარ კუნთს, გულს აძლიერებს. კარგი ვარჯიში ინფარქტის, გულის უკმარისობის, იშემიური დაავადების და მსგავსი უსიამოვნო მოვლენების განვითარების რისკს ამცირებს. ვარჯიშით სისხლძარღვებიც ძლიერდება, რაც ინსულტისგან გვიცავს. დღეში 40 წუთი ფეხით იარეთ ან ნახევარი საათი ცურვას დაუთმეთ. ეს თქვენი გულისთვის სასარგებლოა.
