ადამიანები გაღვიძების შემდეგ საკუთარ თავს კიდევ 5-10 წუთით დაძინების უფლებას აძლევენ, რაც გავრცელებული შეცდომაა. არადა ამ დროში შესაძლებელია მოთელვა, ენერგიის მოზღვავება და მთელი დღე კარგი განწყობის შენარჩუნება. Vivien–ის რედაქცია გირჩევთ, მინიმუმ 5 წუთი დილის ვარჯიშს დაუთმოთ, პოზიტივით და კარგი განწყობით დაიმუხტოთ. ნახეთ, რატომა არის სასარგებლო დილის ვარჯიშები.
დილის ვარჯიშის სარგებელი
ენერგიის ერთ–ერთი ხელმისაწვდომი წყარო – მარტივი მოთელვები საყვარელი მუსიკის ფონზე.
მოთელვას ასე ტყუილად არ უწოდებენ. მოთელვა:
- მთელი დღით პოზიტივით დაგმუხტავთ;
- იმუნიტეტის გაზრდას ხელს უწყობს (რაც შუა სეზონურ პერიოდში განსაკუთრებით მნიშვნელოვანია);
- ცხიმის წვას აჩქარებს;
- კუნთებს აძლიერებს;
- დგომის და სიარულის გაუმჯობესებას ხელს უწყობს;
დილის ვარჯიშების შესრულების წესები
დილის ვარჯიშებიდან მაქსიმალური დადებითი შედეგის მისაღებად, დაიცავით შემდეგი წესები:
- რეგულარულად შეასრულეთ.
- საუზმის წინ ივარჯიშეთ.
- ვარჯიშამდე კბილები გაიხეხეთ და დაიბანეთ. ასე ტვინი იღვიძებს, სხეული ფიზიკური აქტივობისთვის უკეთ ემზადება.
- 1 ჭიქა შემთბარი წყალი დალიეთ, სჯობს ციტრუსის წვენი დალიოთ.
- დღის განმავლობაში სითხე რეგულარულად მიიღეთ.
- ვარჯიშები ეტაპებად დაყავით, თითოეული სხეულის ნაწილი გაავარჯიშეთ.
- ვარჯიშის დროს სწორად, ზომიერად ისუნთქეთ.
ვარჯიშების თანმიმდევრობა
სკოლაში ფიზკულტურის გაკვეთილები გაიხსენეთ. დატვირთვამდე მასწავლებელი ტანვარჯიშის გაკეთებას, სხეულის თითოეული ნაწილის მოთელვას გვაიძულებდა. განსაკუთრებული ყურადღება ეთმობოდა იმ ნაწილებს, რომელზეც ძირითადი დატვირთვა იქნებოდა კონცენტრირებული.
მაგალითად, სირბილის წინ ფეხების მოთელვა ხდებოდა, აზიდვების წინ ზურგის და ხელების მოთელვა. იგივე პრინციპი მოქმედებს სახლში ვარჯიშის დროს.
მოთელვა კისრის კუნთების გახურებით იწყება: თავი ატრიალეთ, ყველა მიმართულებით დახარეთ, მარჯვნივ–მარცხნივ აბრუნეთ.
ამის შემდეგ მხრების სახსრები გაახურეთ: მხრები მაღლა აწიეთ, შემდეგ დაუშვით. მხრებით წრეები მოხაზეთ. ხელები გადააჯვარედინეთ და ზემოთ აწევა სცადეთ, თითქოსდა ცდილობთ მზეს მიწვდეთ.
ზურგის კუნთების გახურება: რაც შეიძლება დაბლა ყველა მიმართულებით დაიხარეთ. თუ შეძლებთ, „მერცხლის“ პოზიცია შეასრულეთ.
ამის შემდეგ წელის ზონას მიხედეთ: ბარძაყებით ორივე მხარეს წრეები მოხაზეთ. ფეხები ზემოთ–ქვემოთ აქანავეთ და გაწელეთ. ამასთან რყევის ამპლიტუდა შეცვალეთ.
ბოლოს ტერფები გაახურეთ: ფეხით თითის წვერებზე დადექით, ყველა მხარეს ატრიალეთ. ასეთი ენერგიული მოთელვის შემდეგ შეგიძლიათ სამზარეულოში შეხვიდეთ.
დამატებითი ვარჯიშები
ზემოთ მოცემული ძირითადი ნაკრების შესრულებას სულ რაღაც 10 წუთი სჭირდება. თუ შეძლებთ, პრობლემურ ადგილებზე იმუშავეთ. ამ მარტივი ვარჯიშების დახმარებით ეფექტს უფრო სწრაფად დაინახავთ.
პირველი პრობლემური ზონა – დუნდულები: ოთხზე დადექით, ხელები გამართეთ, ორივე ფეხი მონაცვლეობით ხერხემლამდე ასწიეთ. დაძაბულობა – დუნდულების ზონაში.
მეორე პრობლემური ზონა – მუცელი: პრესის კუნთების სხვადასხვა ვარჯიში გამოგადგებათ. უმარტივესი ვარიანტი – „ველოსიპედი“. დიდ სარგებელს მიიღებთ, თუ მხრებს იატაკიდან აწევთ, ხელებს მოხრით და კისერთან დაიდებთ.
მესამე პრობლემური ზონა – ბარძაყის შიდა მხარე. გვერდზე დაწექით, ერთი ფეხი მოხარეთ, მეორე გამართეთ და ზემოთ სწრაფად აწიეთ–დაწიეთ. თუ ბარძაყებში დაძაბულობას გრძნობთ, ვარჯიშს სწორად ასრულებთ.
მეოთხე პრობლემური ზონა – მხრების შიდა ნაწილი. ეს ნაწილი ხშირად ჩამოწელილი ჩანს. მას ასე ჭიმავენ: მკერდის წინ ხელისგულები შეაერთეთ ისე, რომ მტევნები და ხელისგულები ერთ დონეზე იყოს. ამის შემდეგ ხელისგულები ერთმანეთს ძლიერ დააჭირეთ და 15 წამით ამ პოზაში გაიყინეთ, სუნთქვა არ შეიკავოთ. დაისვენეთ და კვლავ გაიმეორეთ.
ფიზიკური აქტივობით არა მხოლოდ წონაში დაიკლებთ და ორგანიზმს გააჯანსაღებთ, არამედ ამტანობას გამოიმუშავებთ და განწყობას გაიუმჯობესებთ. ტანვარჯიში ყოველდღე უნდა შეასრულოთ.
