კალციუმი – ადამიანის ორგანიზმში მნიშვნელოვანი ელემენტია, რომელიც განსაკუთრებით აუცილებელია ბავშვებში, სრულყოფილი განვითარებისთვის. 4-8 წლის ბავშვებში კალციუმის დღიური ნორმა შეადგენს 1000 მგ-ს, ხოლო 9-18 წლის ასაკში – 1300მგ-ს.

მოზარდობის პერიოდში, კალციუმის საკმარისი რაოდენობა აუცილებელია ორგანიზმისთვის, ჩონჩხის ინტენსიური ზრდის გამო. კალციუმის უდიდესი ნაწილი კბილებსა და ძვლებშია თავმოყრილი.

კალციუმის დეფიციტი

გარდა ჩონჩხის ფორმირებისა, კალციუმი მონაწილეობს სხვა, სასიცოცხლოდ მნიშვნელოვან პროცესებშიც: სისხლის შედედებაში, კუნთების შეკუმშვაში, ჰორმონებისა და ნეირომედიატორების სეკრეციაში.

დაბალანსებულ დიეტაში, კალციუმის დიდი ნაწილი ბავშვის ორგანიზმში რძის პროდუქტებით ხვდება. ხოლო დანარჩენ ნაწილს მოზარდი იღებს მარცვლეულით, წიწიბურით, პარკოსნებით, ფორთოხლით, თხილით, მწვანილით…

ნაწლავებში კალციუმის შეწოვა D ვიტამინის მონაწილეობით ხდება. ამ ვიტამინის დეფიციტს კალციუმის დეფიციტის გამოწვევა შეუძლია. ასევე, კალციუმის ათვისებას ხელს უშლის ძროხის რძე, საქონლის ცხიმი და პალმის ზეთი.

ექიმი კომაროვსკი გვიხსნის, თუ როგორ უნდა ამოვიცნოთ ბავშვებში კალციუმის დეფიციტი. მისი სიმპტომებია: ძილის დარღვევა, პრეტენზიულობა, ალერგიული რეაქციები, სისხლის შედედებასთან დაკავშირებული პრობლემები, ძვლოვან სისტემასთან დაკავშირებული პრობლემები.

იმაში დასარწმუნებლად, რომ ზემოთ ჩამოთვლილი უსიამოვნებების მიზეზი კალციუმის დეფიციტია, აუცილებელია ანალიზის ჩაბარება. მხოლოდ ამის შემდეგ უნდა იზრუნოთ დეფიციტის შევსებაზე: უნდა შეასწოროთ რაციონი, გამოიყენოთ დამატებითი ვიტამინური მულტიკომპლექსი, რომლის შემადგენლობაში უნდა იყოს კალციუმი, ფოსფორი, ფტორი და D ვიტამინი.

ყურადღება გაამახვილეთ მწვანილის მოხმარებაზეც. ადამიანთა უმეტესობა მას ამაოდ უგულებელყოფს, მწვანილებს შორის კი მხოლოდ ოხრახუშსა და კამას მიირთმევენ, ისიც ძალიან იშვიათად. ცოტამ თუ იცის, რომ 100 გ ისპანახი 136 მგ კალციუმს შეიცავს, ეს კი იმაზე მეტია, ვიდრე ამდენივე რძეში არსებული კალციუმის მარაგი. ორგანიზმის კალციუმითა და D ვიტამინით შევსება შეიძლება სალათის ფოთლებითა და რუკოლათიც.

რაც შეეხება D ვიტამინს, მას ორგანიზმი დამოუკიდებლად წარმოქმნის, მზის ზემოქმედების დროს. თუმცა, იგი ზოგიერთი საკვები პროდუქტის შემადგენლობაშიცაა.

ყველაზე დიდი რაოდენობით, D ვიტამინი ქაშაყის, ორაგულის ხორცში, ვირთევზასა და ძროხის ღვიძლში, მყარ ყველში, კარაქსა და ქათმის კვერცხებშია. ზამთარში აუცილებლად უნდა ჩართოთ ეს პროდუქტი როგორც ბავშვის, ისე უფროსების რაციონშიც.

ორგანიზმში კალციუმისა და D ვიტამინის ხანგრძლივი დეფიციტი ზრდის ოსტეოპოროზის გაჩენის რისკს, უფრო მცირე ასაკში კი იწვევს რაქიტს. ოსტეოპოროზი – ძვლის ქსოვილის სიმკვრივის პროგრესირებადი შემცირებაა, რომელიც იწვევს ძვლის გამძლეობის დაქვეითებას. ამ ყველაფრის შედეგად, მოტეხილობის მიღება შესაძლებელია უმცირესი დატვირთვის დროსაც კი.

გისურვებთ ჯანმრთელობას!