იოგას სწავლებებში ნათქვამია, რომ ჯანმრთელობისა და ხანგრძლივი ცხოვრების წინაპირობა მყარი და მოქნილი ხერხემალია. ხერხემლის მდგომარეობით განისაზღვრება მთელი ორგანიზმის ჯანმრთელობაც. ამიტომაა ამდენად აუცილებელი ხერხემლის მდგომარეობისა და მოქნილობის გაუმჯობესება.
ამაში საუკეთესოდ დაგეხმარებათ აკარნა დხანურასანა – მშვილდოსნის პოზა. დღეს ჩვენი რედაქცია გასწავლით ამ სავარჯიშოს სწორად შესრულების ტექნიკას.
საშინაო იოგა ზურგისთვის
მშვილდოსნის პოზა – ერთ-ერთი საუკეთესო ასანაა ზურგისა და ხერხემლისთვის. იგი ორგანიზმზე კომპლექსურად მოქმედებს: აძლიერებს მხრებსა და კისერს, ანიჭებს ფეხებს მოქნილობას, აუმჯობესებს საჭმლის მონელებასა და პერისტალტიკას. გარდა ამისა, რეგულარული შესრულების შემთხვევაში, უზრუნველყოფთ ვიწრო და მოყვანილ წელსაც.
ეს ასანა ძალიან ძლიერია ენერგეტიკულ ასპექტშიც. იგი გვეხმარება ენერგეტიკული არხების გაწმენდასა და ნერვული სისტემის აღდგენაში. შესრულების შემდეგ იგრძნობთ, როგორ ივსება თქვენი სხეული ენერგიითა და ძალებით.
საერთო ჯამში, ასანის სარგებელი ძალიან დიდია ორგანიზმისთვის, ამიტომ მისი ჩართვა დილის სავარჯიშოების კომპლექსში აუცილებელია. ახლა დროა, მისი შესრულების ტექნიკაზე ვისაუბროთ.
ცოტაოდენი მოთელვის შემდეგ, დაჯექით იატაკზე და გაწიეთ ფეხები წინ. ოდნავ დაიხარეთ და ეცადეთ, დუნდულები მჭიდროდ მოათავსოთ იატალზე. ბარძაყების ქვედა ნაწილიც იატაკს უნდა ეხებოდეს.
ახლა გაასწორეთ ხერხემალი, გამართეთ მხრები და გაშალეთ გულ-მკერდი. დაიხარეთ ფეხებისკენ, ოღონდ შეინარჩუნეთ ხერხემლის სისწორე. მარჯვენა ფეხის დიდი თითი აიღეთ მარჯვენა ხელით, ხოლო მარცხენათი ჩაეჭიდეთ მეორე ფეხის დიდ თითს.
დაუბრუნდით ვერტიკალურ მდგომარეობას წელით, მიიზიდეთ მარჯვენა ტერფი მარჯვენა ყურთან მაქსიმალურად ახლოს. მარცხენა ფეხი იატაკს არ უნდა მოაცილოთ, მუხლიც არ უნდა მოხაროთ. თუ არ გამოგდით მარცხენა ფეხის თითზე ხელის გაჩერება, მოათავსეთ ხელის გული კოჭზე ან მუხლზე.
დააფიქსირეთ დასრულებული მდგომარეობა 1-2 წუთით. ისუნთქეთ ღრმად და თანაბრად, არ მოხაროთ ზურგი. თუ ასანის ცოტათი გართულება გსურთ, გაწელეთ მარჯვენა ფეხი ზემოთ. ჩაისუნთქეთ, გაწელეთ და გადაიტანეთ ფეხი კიდევ უფრო უკან, რათა ტერფით ყურს შეეხოთ. შეიკავეთ ეს მდგომარეობა 10-15 წამით. ჯამში, ამ სავარჯიშოს შესრულებას გვირჩევენ 11 წუთით, ორივე მხარეს.
სავარჯიშოს შესრულებისას წარმოიდგინეთ, რომ მშვილდისარს ამზადებთ სასროლად. კონცენტრირდით მიზანზე. ეს შესანიშნავი სავარჯიშო კონცენტრაციის გაუმჯობესებაშიც დაგეხმარებათ. მისი იდეალური ვარიანტია ყველა ფიქრისგან გათავისუფლება და სავარჯიშოს მთელი გულითა და გონებით შესრულება.
ამოსუნთქვისას ნაზად გამოდით პოზიდან, გაწელეთ ფეხები იატაკის გასწვრივ. დაისვენეთ რამდენიმე წამით და შეასრულეთ ასანა მეორე მხარეს. დაიცავით დროის ერთი და იგივე მონაკვეთი. ამის შემდეგ მოდუნდით და დაწექით ზურგზე ან ემბრიონის პოზაში 1 წუთით, რათა ხერხემალმა დასვენება შეძლოს.
ასანის დასრულებისთანავე იგრძნობთ, როგორ გაივსო სხეული ძალებით. თუ სავარჯიშოს რეგულარულად შეასრულებთ, ცოტა ხანში შეამჩნევთ, როგორ ხდება ხერხემალი სულ უფრო მოქნილი, ზურგის ტკივილები კი ქრება.
როგორც ნებისმიერ ფიზიკურ პრაქტიკას, ამ ასანასაც აქვს თავისი უკუჩვენებები და ესენია: ჰიპერტონია, ფეხმძიმობა, გულის დაავადებები, კუჭის წყლული, კოლიტი, მალთაშუა დისკების თიაქარი ან აღრევა.
