არავინ შეგვედავება, რომ სუნი, რომელიც ადამიანს ასდის, პირდაპირ გავლენას ახდენს იმაზე, თუ როგორ აღიქვამენ მას გარშემომყოფები. სუფთა კანი, ფრჩხილები და თმა არის გარანტი იმისა, რომ თანამოსაუბრე ისიამოვნებს თქვენთან ურთიერთობით. მაგრამ ხანდახან ხდება, რომ მიუხედავად ყველა ჰიგიენური პროცედურისა, უსიამოვნო სუნი არ ქრება. მაგალითად, იმის გაგება, თუ რატომ ასდის თმას ცუდი სუნი, ზოგჯერ საკმაოდ რთულია.
ერთ ჩემს მეგობარს ძალიან დიდი ხნის განმავლობაში აწუხებდა უსიამოვნო სუნი თმიდან. მან სცადა სხვადასხვა ნიღბები, სპრეები და შამპუნები, მაგრამ მდგომარეობა არ გაუმჯობესებულა. ასე იყო მანამდე, სანამ მან ექიმთან მისვლა არ გადაწყვიტა. სიტუაცია მოწესრიგდა მხოლოდ მას შემდეგ, რაც ჩემმა მეგობარმა ექიმის ყველა რჩევა გაითვალისწინა. და თუ თმის ცუდი სუნი თქვენც გაწუხებთ, მაშინ დიდი ალბათობით მიზეზი ქვემოთ მოყვანილ ერთ-ერთ პუნქტშია.
რატომ ასდის თმას ცუდი სუნი?
ტრიქოლოგები ამბობენ, რომ თმას უსიამოვნო სუნი, ძირითადად, სკალპთან დაკავშირებული პრობლემების გამო აქვს. სწორედ ამიტომ მნიშვნელოვანია ვიცოდეთ, რა მიზეზებმა შეიძლება გამოიწვიოს ასეთი უსიამოვნება.
თავის კანის ინფექციები
თუ თავის კანი დაავადებულია რაიმე სოკოვანი ინფექციით, ამან შეიძლება გამოიწვიოს უსიამოვნო სუნის გაჩენა. მიზეზი ის არის, რომ სხვადასხვა მიკროორგანიზმები ხელს უწყობენ ცხიმის უფრო აქტიურ სეკრეციას, ვიდრე ჩვეულებრივ. ეს აფერხებს ჟანგბადის ნაკადს სკალპში, რაც იწვევს სუნის გაჩენას.
სიმპტომი, რომელიც მიუთითებს თავის კანის ინფექციურ დაავადებაზე, იქნება ქერტლის გაჩენა. გარდა ამისა, თუ კანზე ჩნდება მშრალი ლაქები, რომლებიც იქერცლება და იწვევს ქავილს, აუცილებლად უნდა დანიშნოთ ვიზიტი დერმატოლოგთან ან ტრიქოლოგთან.
არასწორი მოვლა
ეს მიზეზი ყველაზე ხშირად ემართებათ მათ, ვინც ზედმეტად ცდილობს სკალპის გასუფთავებას. ყველაზე ხშირად ეს პრობლემა თავს იჩენს თავის ძალიან ცხელი წყლით დაბანისას. გახსოვდეთ, რომ ზედმეტად ცხელი წყალი და ძალიან ხშირი დაბანა ააქტიურებს კანის ცხიმის გამოყოფას. შედეგად, თმა უფრო სწრაფად ხდება ჭუჭყიანი. გარდა ამისა, ცხიმი გროვდება კანის ზედაპირზე, რაც ასევე ხელს უწყობს თმის უსიამოვნო სუნის გაჩენას.
სხვათა შორის, ძალიან ძლიერი საშუალებების გამოყენებამ ასევე შეიძლება შეუწყოს ხელი უსიამოვნო სუნის გაჩენას. მიზეზი ის არის, რომ აგრესიული შამპუნებით ზედმეტად გამშრალი თავის კანი შეეცდება მიკრობიომის აღდგენას, რა დროსაც ზედმეტ ცხიმს გამოყოფს.
ჰორმონალური ცვლილებები
ნებისმიერი ჰორმონალური ცვლილებებისას, ხდება ორგანიზმის ყველა სისტემის ნორმალური ფუნქციონირების დარღვევა. გარდა ამისა, ორგანიზმს შეუძლია გამოყოს სხვადასხვა კომპონენტები, რომლებიც ხელს უწყობენ უსიამოვნო სუნის გაჩენას. შესაძლოა დაირღვეს ოფლის გამოყოფა, რაც ასევე უარყოფითად მოქმედებს სკალპის მდგომარეობაზე.
რაც უფრო დიდხანს გრძელდება ჰორმონალური პრობლემები, მით მეტია სიმპტომების გაუარესების ალბათობა. ამიტომ, კანის უსიამოვნო სუნის უეცარმა გაჩენამ უნდა დაგაფიქროთ, რაც ნიშნავს იმას, რომ უმჯობესია რჩევისთვის მიმართოთ ექიმს.
ორგანიზმის სისტემების დაავადებები
ნებისმიერი დაავადება უარყოფითად მოქმედებს ჩვენი ორგანიზმის ფუნქციონირებაზე. მათ შორის, კანის მდგომარეობაზე. მიზეზი ის არის, რომ ის ტოქსინები, რომლებიც გამოიდევნება ჯანსაღი ორგანიზმიდან, შესაძლოა უფრო მეტად შეყოვნდეს ავადმყოფობის დროს. ეს განსაკუთრებით ეხება თირკმელების, ღვიძლისა და ნაწლავების დაავადებებს. დაგროვილმა ტოქსიკურმა ნივთიერებებმა შეიძლება გავლენა იქონიოს ოფლისა და ცხიმოვანი ჯირკვლების ფუნქციონირებაზე. ეს, თავის მხრივ, იწვევს უსიამოვნო სუნს თავის კანიდან.
ცხოვრების წესი
პარფიუმერები ამტკიცებენ, რომ თმა არის ერთ-ერთი ის ზონა, რომელიც ყველაზე უკეთ ინარჩუნებს სუნამოს არომატს. და ეს მართალია. თუმცა, მნიშვნელოვანია გვესმოდეს, რომ სუნამოს სუნის გარდა, ჩვენს კულულებს შეუძლიათ შეითვისონ საკმაოდ უსიამოვნო არომატებიც. ეს შეიძლება იყოს კვამლის, თამბაქოს, სხვადასხვა ქიმიური საშუალებების და თევზის სუნი.
ამიტომ, არ დაგავიწყდეთ, რომ ზედმეტად მძაფრი სუნის მქონე ნივთიერებებთან მუშაობისას ჯობია ქუდი ან თავსაბურავი გაიკეთოთ. ცეცხლთან დასვენებისას, უმჯობესია თმა შეიკრათ. ეს ხელს შეუწყობს იმას, რომ თმა სუნს არ შეითვისებს და მის ზედაპირზე დარჩება.
ვინაიდან თმას ცუდი სუნი უმიზეზოდ არ ასდის, ყურადღება უნდა მიაქციოთ ამ სიმპტომს და საჭიროების შემთხვევაში მიმართოთ ექიმს.
