ბებიას ვაშლის ღვეზელების არომატი სამუდამოდ დარჩება ჩემს მეხსიერებაში. როცა ღუმელში შედგამდა, ისეთი ძლიერი არომატი ტრიალდებოდა, რომ მე და ჩემი და მისი ძველი სახლის ყველაზე შორეული ოთახებიდან მივრბოდით სამზარეულოში. ყველაზე საინტერესო ის არის, რომ ბებიას საერთოდ არ უყვარდა მომზადება და, შესაბამისად, მისი ყველა რეცეპტი ძალიან მარტივი იყო. მაგალითად, ის ვაშლის ღვეზელს დაახლოებით ნახევარ საათში აცხობდა.
თხელი, დაბრაწული, გემრიელი ვაშლის შიგთავსით! ძნელია მოიფიქრო უკეთესი ნამცხვარი ჩაისთვის. ეს რეცეპტი იმდენად დიდი ხანია, რაც ჩვენს წრეში პოპულარულია, რომ ძნელი სათქმელია, ვინ აღმოაჩინა პირველად.
როგორ მოვამზადოთ ვაშლის ღვეზელები ღუმელში
პირადად მე, აღფრთოვანებული ვარ თავად ცომით. არავითარი წვალება და ლოდინი. ასეთ ღვეზელს, საღამოს, მძიმე სამუშაო დღის შემდეგაც კი მოამზადებთ. ცომის ამოსვლას დაახლოებით 10 წუთი სჭირდება და ღუმელში შესანიშნავად ცხვება. ხანდახან წყალს რძით ვანაცვლებ, როცა ხელთ მაქვს – უფრო გემრიელიც კი გამოდის.
დაგჭირდებათ:
- 750 გ ხორბლის ფქვილი;
- 350 მლ წყალი;
- 50 გ ცოცხალი საფუარი;
- მარილი გემოვნებით;
- 150 გ შაქარი;
- 900 გ ვაშლი;
- 125 მლ მზესუმზირას ზეთი;
- 60 გ კარაქი;
- დარიჩინი გემოვნებით;
- 1 კვერცხი.
1. საფუარი მთავარ როლს ასრულებს, ამიტომ არ დაიზაროთ მისი წინასწარ მომზადება! თბილ წყალში გახსენით ახალი საფუარი – 1 სუფრის კოვზ შაქართან და 6 სუფრის კოვზ ფქვილთან ერთად. დააყოვნეთ 5 წუთი თბილ ადგილას.
2. ამ მასას დაუმატეთ რამდენიმე მწიკვი მარილი და დარჩენილი ფქვილი, თანდათან დაასხით ზეთი. მოზილეთ რბილი და ელასტიური ცომი, გააჩერეთ 10 წუთი.
3. ამ დროის განმავლობაში მოამზადეთ შიგთავსი: გაასუფთავეთ ვაშლი და დაჭერით პატარა კუბებად. შეურიეთ შაქარი, დარიჩინი და დარბილებული კარაქი.
4. ცომი გაყავით პატარა ბურთულებად, გააბრტყელეთ საკმაოდ თხლად და მასზე მოათავსეთ ერთ ნახევარი ან ორი სუფრის კოვზი შიგთავსი. შეკარით და მოათავსეთ ცხიმწასმულ საცხობ ფირფიტაზე.
5. კვერცხი ათქვიფეთ, დაუმატეთ მწიკვი შაქარი, გადაუსვით ღვეზელებს და გამოაცხვეთ 180 გრადუსზე გახურებულ ღუმელში – 15 წუთის განმავლობაში. მზადაა!
აქვე გაგიზიარებთ ბებიაჩემის კიდევ ერთ საიდუმლოს: ამ ვაშლის ღვეზლისთვის ის ყოველთვის მხოლოდ მწვანე ვაშლს იყენებდა. რატომ? იმიტომ, რომ მას აქვს სასიამოვნო სიმჟავე, რომელიც ცომეულს სასიამოვნო გემოს აძლევს. თუ ვაშლი ძალიან მკვრივია, გაზარდეთ გამოცხობის დრო 20 წუთამდე. გემრიელად მიირთვით!
