რაც არ უნდა ოსტატურად გამოიყენოთ სამზარეულოში ეგზოტიკური ინგრედიენტები, არაფერი შეედრება ახლად მომზადებულ მაკარონს. მაკარონის მომზადება მარტივი საქმეა, მაგრამ ზოგჯერ გამოცდილი დიასახლისებიც კი ვერ ახერხებენ იდეალური მაკარონის მომზადებას. მაკარონი ხან შეწებებულია, ხან ფაფად ქცეული. თუ თქვენც ასე გემართებათ, იმედს ნუ დაკარგავთ – სიტუაციის გამოსწორებაში სახლური სოუსი დაგეხმარებათ. მარტივი რეცეპტისა და ხელმისაწვდომი ინგრედიენტების წყალობით, მისი მომზადება სულ რამდენიმე წუთშია შესაძლებელი. ვივიენის დღევანდელ სტატიაში გთავაზობთ გემრიელი სოუსის რეცეპტს მაკარონისთვის.
სოუსი გააუმჯობესებს არა მხოლოდ მაკარონის გემოს, არამედ მრავალი ძირითადი კერძის და გარნირის გემოს. სცადეთ მისი დამატება, მაგალითად, კატლეტებში, ტოლმაში ან კარტოფილის პიურეში. ეს უნივერსალური რეცეპტი – საუკეთესო დამხმარეა დიასახლისებისათვის. მისი წყალობით თქვენი კულინარიული შედევრები ყველაზე მომთხოვნი გურმანების გულებსაც კი მოიგებს.
როგორ მოვამზადოთ ტომატისა და არაჟნის სოუსი მაკარონისთვის
ინგრედიენტები
- 5 ს.კ. მცენარეული ზეთი;
- 50 გ კარაქი;
- 5 ჩ.კ. ხორბლის ფქვილი;
- 5 ს.კ. ტომატის პასტა;
- 3 ჭიქა ბულიონი;
- მარილი, შავი პილპილი გემოვნებით;
- 5 ს.კ. არაჟანი.
მომზადების წესი
1. ტაფაში ჩაასხით მცენარეული ზეთი და დაამატეთ კარაქი. გააცხელეთ დაბალ ცეცხლზე, ყურადღება მიაქციეთ, რომ არ ადუღდეს.
2. დაუმატეთ ფქვილი და აურიეთ სათქვეფით ან ჩანგლით – სქელი ერთგვაროვანი მასის მიღებამდე.
3. დაამატეთ ტომატის პასტა და კვლავ აურიეთ.
4. შემდეგ დაიწყეთ ბულიონის თანდათანობით ჩასხმა, ყოველი დამატების შემდეგ კარგად აურიეთ. ბულიონის ნაცვლად შეგიძლიათ გამოიყენოთ ჩვეულებრივი წყალი.
5. მოაყარეთ მარილი, პილპილი და დაამატეთ თქვენი საყვარელი სანელებლები. ბოლოს დაამატეთ არაჟანი და როგორც კი სოუსი ადუღდება, ტაფა ცეცხლიდან გადმოდგით.
რა ადვილია მაკარონის სქელი სოუსის მომზადება! ეს საოცრად გემრიელი, არომატული და მსუყე სოუსი მალე ნებისმიერი კერძის შეუცვლელ დამატებად იქცევა. პირადად მე, ხშირად მივმართავ ამ რეცეპტს, როცა თავზე მშიერი ოჯახის წევრები მადგანან.
