გავზარდოთ ორქიდეა ფესვიდან

ბოლო ათწლეულის განმავლობაში ორქიდეა ერთ-ერთ ყველაზე პოპულარულ ოთახის მცენარედ იქცა. გასაკვირი არ არის, რადგან ის წარმოუდგენლად ლამაზია. უნაზესი ყვავილები მოხდენილი ღეროებით, ნებისმიერ ინტერიერს ამშვენებს. რა თქმა უნდა, ბევრ დიასახლისს სურს მცენარის გამრავლება, რათა ეს ლამაზი ყვავილი სხვა ოთახში მოათავსოს ან მეგობარს აჩუქოს. კითხვაზე “როგორ გავზარდოთ ორქიდეა?” – რამდენიმე პასუხი არსებობს.

ოთახის მცენარეების მოყვარულთა უმეტესობა ორქიდეებს ამრავლებს “შვილების” დახმარებით. ისინი ჩნდებიან დედა მცენარეზე. გარდა ამისა, შეგიძლიათ გაზარდოთ ახალი ყვავილი კალმიდან. მაგრამ არის მესამე გზაც. ვივიენის დღევანდელ სტატიაში გეტყვით, როგორ უნდა გაზარდოთ ორქიდეა ფესვიდან.

როგორ გავზარდოთ ორქიდეა ფესვიდან სახლის პირობებში

როგორც წესი, ორქიდეას ფესვიდან იმ შემთხვევებში ზრდიან, როდესაც მცენარის მიწისზედა ნაწილი ხმება. რა თქმა უნდა, ჯერ უნდა დარწმუნდეთ, რომ ფესვთა სისტემა ჯანმრთელია. ნუ იჩქარებთ დამჭკნარი ორქიდეის გადაგდებას, რადგან შეგიძლიათ ფესვიდან ახალი ჯანსაღი ყვავილი გაზარდოთ.

ფესვების მომზადება

მცენარე ამოიღეთ ქოთნიდან და ფესვები გაასუფთავეთ დარჩენილი ნიადაგისგან. ამის შემდეგ, ფესვი ბასრი დანით გაჭერით ისე, რომ თითოეულ ნაწილში, რომლის გამოყენებასაც აპირებთ, დარჩეს მინიმუმ ორი ფსევდობულბა. ეს არის იდეალური ნერგის ზომა ორქიდეის გასამრავლებლად. მოჭრილი ადგილები დაამუშავეთ დარიჩინით: სანელებელი მცენარის დეზინფექციას მოახდენს.

ნიადაგის შერჩევა

დაგჭირდებათ ნიადაგი, რომელიც სპეციალურად ორქიდეებისთვისაა განკუთვნილი. ის შეგიძლიათ ნახოთ ნებისმიერ მებაღეობის მაღაზიაში. ამ ნიადაგში უფრო ადვილი იქნება თქვენი პატარა ორქიდეის გაზრდა. სპეციალური ნიადაგი შეიცავს ქოქოსის ბოჭკოს, ტორფს და ფიჭვის ქერქის ნაჭრებს. ის, რაც სჭირდება ორქიდეას!

დაფესვიანება

აავსეთ ქოთნები მიწით და ჩარგეთ მომზადებული ფესვები. როგორც წესი, ამ ეტაპზე პრობლემები არ ჩნდება. დროთა განმავლობაში დაინახავთ ახალი ფესვების და ფოთლების გამოჩენასაც კი. ეს კარგი ნიშანია. თქვენგან დამატებითი ქმედებები არ არის საჭირო.

მცენარის მოვლა

თუ ხედავთ, რომ მცენარე წესრიგშია, ნუ მიმართავთ დამატებით მანიპულაციებს. იზრუნეთ პატარა ორქიდეაზე ისევე, როგორც ზრდასრულ მცენარეზე. შეგახსენებთ, რომ ორქიდეისთვის ოპტიმალური ტემპერატურაა 16-24°C-ია, ხოლო დღის განათება – 8 საათი. მცენარე მორწყეთ ზომიერად. ორქიდეამ შეიძლება დაიწყოს ლპობა ზედმეტი მორწყვისგან და ჭკნობა ტენიანობის ნაკლებობის გამო. გამოიყენეთ ქოთანი თეფშით, რათა მცენარემ დამოუკიდებლად დაარეგულიროს წყლის რაოდენობა. და, რა თქმა უნდა, არ დაგავიწყდეთ ამ კაპრიზული ყვავილისთვის სასუქის მიცემა.

როგორც ხედავთ, ფესვიდან ორქიდეის გაშენება არც ისე რთული საქმეა. გაზარდეთ ორქიდეები და განათავსეთ ისინი თქვენს სახლში. გარდა ამისა, ბევრ მეგობარი ან ნათესავი აღფრთოვანებული იქნება ასეთი შესანიშნავი საჩუქრით.