ყურადღება გაგეფანტათ და თვალყური ვერ მიადევნეთ ნამცხვარს, რომელიც დაიწვა? ეს შეიძლება ნებისმიერს დაემართოს. მაგრამ ამის გამო ძალიან არ უნდა ინერვიულოთ, რადგან დამწვარი ნამცხვრის გადარჩენა შესაძლებელია.
პირველი უსიამოვნო მომენტი, რომელიც შეიძლება შეგხვდეთ, არის სამზარეულოში დამწვრის სუნი. მისგან თავის დასაღწევად გახსენით ფანჯარა და გაანიავეთ ოთახი. მეორე ნიუანსია ნამცხვრის შავი ქერქი. ვივიენის დღევანდელ სტატიაში გიამბობთ, თუ როგორ უნდა გადაარჩინოთ დამწვარი ნამცხვარი.
როგორ გადავარჩინოთ დამწვარი ნამცხვარი: 5 ვარიანტი
მეთოდი №1
ნამცხვარზე დამწვარი ადგილების მოსაშორებლად გამოიყენეთ წვრილნახვრეტებიანი სახეხი. საუკეთესოა ის, რომელსაც იყენებთ ლიმონის ცედრის გასახეხად. თუ დამწვარი ნაწილი ჯერ კიდევ არ არის ქცეული სქელ ქერქად, გამოიყენეთ ბოსტნეულის სახეხი, რათა მოაშოროთ ნებისმიერი გაშავებული ადგილი.
მეთოდი № 2
ნამცხვრის არა მხოლოდ ზედა და ქვედა ნაწილი დაიწვა, არამედ თავად ნამცხვარიც გამოშრა? ამ შემთხვევაში გამომცხვარი ბისკვიტი გაჭერით 2 ნაწილად. თითოეული ნაწილი კარგად დაასველეთ გამდნარი კარაქით ან შაქრის სიროფით (ვანილის ან კონიაკის დამატებით).
მეთოდი №3
მას შემდეგ, რაც დამწვარი ნაწილები სახეხით მოაშორეთ, ნამცხვარი მიმზიდველად არ გამოიყურება? ამ შემთხვევაში აუცილებელია ყველა ხარვეზის შენიღბვა. შეგიძლიათ მზა ნამცხვარი დაჭრათ და მის ფენებს წაუსვათ ნებისმიერი კრემი (შოკოლადის, ნაღების, მარწყვის და ა.შ.). დესერტს ზემოდან მოასხათ შოკოლადის ან ცილის მინანქარი. ასევე შეგიძლიათ სცადოთ ნამცხვრისთვის „გრიმის“ გაკეთება ათქვეფილი კრემის გამოყენებით, მორთოთ იგი საკონდიტრო ტომრის გამოყენებით.
მეთოდი №4
თუ დამწვარი ნაწილების მოჭრის შემდეგ თქვენი ნამცხვარი მოცულობით გაცილებით მცირე გახდა, მისგან გამოჭერით პატარა ნამცხვრები. ამისათვის გამოიყენეთ სპეციალური კულინარიული რგოლი ან ჭიქა. ბისკვიტის ნაჭრები ამოავლეთ კრემში, შემდეგ კი მორთეთ გამდნარი შოკოლადით. სხვათა შორის, ასეთი დესერტი შეგიძლიათ მორთოთ ახალი კენკრით ან დაჭრილი კაკლით.
მეთოდი №5
მოგიწიათ გაშავებული ბისკვიტის დიდი ნაწილის მოჭრა და შედეგად დაგრჩათ ნამცხვრის მცირე ნაწილი? გამოდის, რომ დროა მოამზადოთ ტრაიფლი – მრავალფენიანი ინგლისური დესერტი. დარჩენილი ბისკვიტი დააქუცმაცეთ ნამცეცების მდგომარეობამდე. შემდეგ სპეციალურ ჭურჭელში ან ჭიქაში დაიწყეთ დესერტის ფორმირება, მონაცვლეობით მოათავსეთ ჭიქაში კრემის, კენკრის და თხილის ფენები.
თუ ვერ ახერხებთ ნამცხვრის ფორმიდან ამოღებას, რადგან ის დამწვარია და ძირზეა მიწებებული, გამოიყენეთ პატარა ხრიკი. შეავსეთ რაიმე ჭურჭელი თბილი წყლით და შემდეგ მოათავსეთ მასში ნამცხვრის ფორმა. 7-8 წუთის შემდეგ, შეძლებთ ბისკვიტის სწრაფად და მარტივად ამოღებას და დამწვარი ადგილების მოცილებას.
