ამერიკელმა ბიზნესმენმა და თანამედროვე „ბენჯამინ ბატონმა“ დრო უკან დააბრუნა და ახლა, ყოველ ახალ წელს, სახეზე ნაოჭები კი არ უჩნდება, არამედ სახის ჯანსაღი ფერი უძლიერდება. ვივიენის დღევანდელ სტატიაში გიამბობთ, როგორ მოახერხა ბიოჰაკერმა ასეთი შესაშური ფიზიკური მაჩვენებლების მიღწევა.
46 წლის მილიარდერის, ბრაიან ჯონსონის სახელი ბოლო წლებში სულ უფრო ხშირად ჩნდება მედიაში. ამერიკელი მეწარმე ცნობილია როგორც ინვესტორი, Kernel-ის და OS Fund-ის დამფუძნებელი და აღმასრულებელი დირექტორი. პირველი ეწევა ტვინის შესწავლას, მეორე ინვესტირებას სამეცნიერო და ტექნიკურ სტარტაპებში. IT სფეროში უზარმაზარი სიმდიდრის გამომუშავების შემდეგ, მამაკაცმა გადაწყვიტა შეწინააღმდეგებოდა ბუნების კანონებს და შეექმნა „ახალგაზრდობის ელექსირი“, რომელიც დაეხმარებოდა მას არა მხოლოდ კარგი ჯანმრთელობის და ნათელი გონების შენარჩუნებაში, არამედ ბოლო უნდა მოეღო ასაკთან დაკავშირებული ცვლილებების განვითარებისთვის. როგორც ჩანს, მან ეს შეძლო, მაგრამ როგორ?
„ბენჯამინ ბატონი“, რომელიც სამყაროს კანონებს დაუპირისპირდა
ბრაიან ჯონსონი დაიბადა და გაიზარდა აშშ-ს შტატ იუტაში. 19 წლის ასაკში ის გახდა მორმონი მისიონერი იესო ქრისტეს უკანასკნელი დღეების წმინდანთა ეკლესიაში და ორი წელი გაატარა ეკვადორში. 2003 წელს, სამშობლოში დაბრუნების შემდეგ მან მიიღო ბაკალავრის ხარისხი საერთაშორისო კვლევებში ბრიგჰემ იანგის უნივერსიტეტში და ოთხი წლის შემდეგ მაგისტრის ხარისხი ჩიკაგოს უნივერსიტეტის ბუტას ბიზნეს სკოლაში.
მთელი ამ წლების განმავლობაში, ბრაიანი ფიქრობდა „ახალგაზრდობის ელექსირის“ იდეაზე და შექმნა პროექტი Blueprint-ი, რომლის დახმარებითაც გეგმავდა 70-ზე მეტი საკუთარი ორგანოს ბიოლოგიური ასაკის შეცვლას. როგორ მოქმედებდა გუნდი და რა პრინციპებით ხელმძღვანელობდა, ზუსტად უცნობია, მაგრამ შედეგები საკმაოდ მოკლე პერიოდის შემდეგ საკმაოდ შთამბეჭდავი გამოდგა. ორ წელიწადში მამაკაცის გული 5 წლით გაახალგაზრდავდა, კანი 28 წლის ადამიანის მსგავსი გაუხდა, ფილტვები კი 18 წლის ადამიანის. ორგანიზმში ანთებითი პროცესების აქტივობა 66%-ით შემცირდა, კუნთები ტონუსში მოვიდა, ხოლო ჭაღარა თმების რაოდენობა 80%-ით შემცირდა. დაბერების საერთო ტემპი 31 წელზე შეჩერდა.
„ახლა უფრო ბედნიერად და ცოცხლად ვგრძნობ თავს, ვიდრე ოდესმე. სხვების მიმართ უფრო კეთილი და ნაკლებად გაღიზიანებული გავხდი. ამან დამაფიქრა: ნაცვლად იმისა, რომ გარემოებებზე იჩივლო, რატომ არ უნდა დაიწყო საკუთარი სხეულის შესწავლა და საკუთარი თავის შეცვლა შინაგანად? უცნაურია, მაგრამ შეიძლება თუ არა, რომ კაცობრიობის მომავალი დაიწყოს იმით, რომ დავიწყოთ ბოსტნეულის ჭამა და დამანგრეველ ქცევებზე უარი ვთქვათ?“ – თქვა ერთხელ ჯონსონმა.
ბრაიანმა თქვა, რომ მისი მთავარი მამოძრავებელი იყო ჭარბი ჭამის პრობლემა. როგორც კი საათი 19:00 უჩვენებდა, ის იწყებდა ყველაფრის შთანთქმას, რასაც ხედავდა. მამაკაცს ნათლად ესმოდა, რომ ასეთი პრაქტიკა კარგ შედეგამდე არ მიიყვანდა და ამიტომ გადაწყვიტა სერიოზულად ჩართულიყო საკუთარ „ხელახალ აღზრდაში“ „ბიოჰაკინგის“ ტექნიკის გამოყენებით (ორგანიზმის ფუნქციონირების გაუმჯობესება მედიკამენტების, კვების, ვარჯიშის და სხვა მეთოდების საშუალებით, რომლებიც საშუალებას აძლევს ტვინის აქტივობის სტიმულირებას და უფრო ნელა დაბერებას – რედაქტორის შენიშვნა).
Blueprint-ის პრინციპები
ანალიზის, დაკვირვებისა და მრავალი სხვა კვლევის კომპონენტის მეშვეობით, ბრაიან ჯონსონმა 30 ექიმისგან შემდგარ გუნდთან ერთად და პროექტში ყოველწლიურად 2 მილიონი დოლარის შეტანით, გამოყო ოთხი პრინციპი, რომელიც ხელს უწყობს ჯანმრთელობის შენარჩუნებას და გაახალგაზრდავების პროცესის დაწყებას.
იმუშავეთ საკუთარ თავზე
რაც არ უნდა მოხდეს თქვენს ცხოვრებაში, არასოდეს შეწყვიტოთ საკუთარ თავზე და საკუთარ ჯანმრთელობაზე მუშაობა. არავინ იცის, რა გველოდება ხვალ და რა განსაცდელების წინაშე აღმოჩნდება კაცობრიობა, ამიტომ ახალ გარემოებებთან უფრო ადვილად ადაპტირებისთვის მნიშვნელოვანია შესანიშნავი ფიზიკური და გონებრივი მომზადება. ნაბიჯ-ნაბიჯ იმუშავეთ ფანტაზიის განვითარებაზე, იზრუნეთ საკუთარ სხეულზე და ბედნიერი იქნებით.
ნუ ავნებთ საკუთარ თავს
თუ რაიმე მიზეზით ჯერ კიდევ არ მოგიშორებიათ ცუდი ჩვევები, მაშინ დროა დაიწყოთ. გააცნობიერეთ საკუთარი პრობლემები და დაიწყეთ მათი გამოსწორება. როგორც კი ბრაიანმა გააცნობიერა, რომ გვიან ჭარბ ჭამას კარგი არაფერი მოჰყვებოდა, მაშინვე ეცადა საკუთარი თავის გადარჩენას და ის ფაქტი, რომ ეს წარმატებული აღმოჩნდა, მხოლოდ უზარმაზარ ნებისყოფასთან და ცვლილების წყურვილთან იყო დაკავშირებული. მან საბოლოოდ მოიშორა ძილის პრობლემები, სწრაფი წონის მომატება და პესიმისტური შეხედულება ცხოვრებაზე.
მოუსმინეთ საკუთარ სხეულს
მაგრამ არა უკონტროლო მავნე სიგნალებს, რომლებიც ხშირად მხოლოდ ცარიელი ილუზიაა. სხეულის ყოველი ახირების დაკმაყოფილება და, მაგალითად, როგორც ბრაიანის შემთხვევაში იყო, საკვების მიღება ყოველგვარი შეზღუდვის გარეშე სრულიად არაგონივრულია. მიიღეთ გადაწყვეტილებები კონკრეტული მაჩვენებლების საფუძველზე. ჯონსონმა საკუთარი რაციონი სპეციალისტების დახმარებით – 70-ზე მეტი ორგანოს ანალიზზე დაყრდნობით შეადგინა.
იხედეთ სიბნელეში, რათა სინათლისგან არ დაბრმავდეთ
ჯონსონი ამ პრინციპს ძველი ხუმრობით ხსნის: „მამაკაცი თავის გასაღებს ქუჩის ფარნის ქვეშ ეძებს. გამვლელი ხედავს ამას და ეკითხება: „დარწმუნებული ხართ, რომ გასაღები აქ დაკარგეთ?” „არა, – პასუხობს ის, – მე ის ქუჩის მეორე მხარეს დავკარგე“. დაბნეული უცნობი ამბობს: „მაშინ აქეთ რატომ იყურებით?” მამაკაცმა უპასუხა: „აქეთ ბევრად უფრო ნათელია!”
რუტინა
გარდა კარგი ჩვევებისა და პოზიტიური აზროვნებისა, ბრაიან ჯონსის ცხოვრებაში არის ადგილი ყველაზე ძირითადი წესებისთვის, მაგალითად, გონივრული დღის წესრიგისთვის.
მაშ ასე, გარდა მკაცრი ვეგანური დიეტისა, რომელიც შეიცავს 1977 კკალს, ყოველდღიურად ერთ საათიანი ვარჯიშისა და კვირაში სამჯერ მაღალი ინტენსივობის ვარჯიშის გარდა, კიდევ რა არის “ახალგაზრდა” მილიარდერის ჩვეულებრივ დღეში?
- ადგომა 05:00 საათზე;
- სპეციალურად შერჩეული საკვები დანამატებისა და მედიკამენტების მიღება 20-დან 100 ცალამდე რაოდენობით;
- ერთსაათიანი ვარჯიში;
- სპეციალური კოქტეილის მომზადება და მოხმარება კერატინის, კოლაგენის პეპტიდების და ამინომჟავეების დამატებით;
- კბილების გახეხვა და ძაფით გასუფთავება, პირის ღრუს ჩაის ხის ზეთით გამოვლება და ღრძილებზე ანტიოქსიდანტური გელის წასმა;
- შემდეგი, საქმეები სამუშაო გრაფიკით და სტრესის მინიმალურ დონემდე შემცირებით;
- ძილის წინ, 2 საათის განმავლობაში, სპეციალური სათვალის ტარება, რომელიც ბლოკავს ლურჯ შუქს;
- წონის, სხეულის მასის ინდექსის და სხეულის ცხიმის, სისხლში გლუკოზის და გულისცემის გაზომვა (ყოველდღიურად) და ულტრაბგერითი კვლევა, მაგნიტურ-რეზონანსული ტომოგრაფია, კოლონოსკოპია, სისხლის ანალიზები (ყოველთვიურად);
- მას შემდეგ, რაც ბიოჰაკერი იძინებს, სპეციალური მოწყობილობა ითვლის ღამის ერექციის რაოდენობას.
პერსპექტივები
ბიზნესმენი ძალიან სერიოზულად ეკიდება დაბერების წინააღმდეგ ბრძოლას. ექსპერიმენტის დასაწყისშივე მან თავისი სახლი სრულფასოვან სამედიცინო ცენტრად აქცია, სადაც ექიმების ჯგუფი მუდმივად აკონტროლებს მის ჯანმრთელობას.
სამომავლოდ, ბრაიანი გეგმავს “ახალგაზრდა სისხლის” თეორიის გამოცდას. მას სურს გაარკვიოს, ეხმარება თუ არა ახალგაზრდების სისხლი დაბერების შენელებას. ჯონსონს უკვე გადაუსხეს 17 წლის შვილის პლაზმა და ის თავად გახდა დონორი ასაკოვანი მამისთვის. მიუხედავად იმისა, რომ ეს ექსპერიმენტი მუშაობდა ლაბორატორიული თაგვების შემთხვევაში, მისი ეფექტურობა ადამიანებში ჯერ კიდევ საეჭვოა. ვინ იცის, იქნებ მილიარდერმა მოახერხოს ამის დამტკიცება?
