როგორც ჩემი მრავალწლიანი გამოცდილება მიჩვენებს, კალმების დასაფესვიანებლად არ არის აუცილებელი ძვირადღირებული ზრდის სტიმულატორების მაღაზიებში შეძენა. ფესვის ზრდის სტიმულატორის დამზადება სახლის პირობებშიც შეგიძლიათ.
უკვე რამდენიმე წელია კალმების დასაფესვიანებლად მხოლოდ ბუნებრივ პროდუქტებს ვიყენებ. და იცით, ისინი ბევრად ეფექტურია, ვიდრე ყველაზე პოპულარული პრეპარატებიც კი. და ამასთანავე ერთ გროშსაც არ ვხარჯავ!
ბუნებრივი დაფესვიანების სტიმულატორი, დროში გამოცდილი საშუალება
ნება მომეცით მოგიყვეთ ჩემი საყვარელი საშუალების შესახებ ნებისმიერი კალმების დასაფესვიანებლად. მისი მომზადება შესაძლებელია რამდენიმე გზით. პრაქტიკაში მხოლოდ 2 რეცეპტს ვიყენებ. შევნიშნე, რომ ამ გზით კალმები უფრო სწრაფად ფესვიანდება.
ვარიანტი №1
დასაწყისისთვის აიღეთ ტირიფის 10 -15 ტოტი, სასურველია ახალგაზრდა მზარდი ხეებიდან. მოჭერით 5-6 მმ სისქის ტოტები და თითოეულზე გააკეთეთ ირიბი ჭრილი. შემდეგ შეავსეთ ჭურჭელი (3 ლიტრიანი) დაახლოებით ნახევრად თბილი ადუღებული წყლით და მოათავსეთ მასში კალმები.
გირჩევთ აირჩიოთ უფრო მოგრძო ჭურჭელი. ისეთი რომ ტირიფის ტოტები ნახევრად მაინც მოთავსდეს წყალში. ზოგი კი ტოტებს მთლიანად წყალში ათავსებს, მაგრამ მე ამის გაკეთებას არ გირჩევთ.
დატოვეთ ტირიფის ტოტები წყალში მინიმუმ 7 დღის განმავლობაში. ამ დროს მათზე პირველი ფესვები გამოჩნდება. როგორც კი ეს მოხდება, ჩაასხით ადუღებული წყალი ჭურჭელში, სანამ არ გაივსება. და ისევ გააჩერეთ ყლორტები წყალში 10 დღის განმავლობაში, რათა ხსნარი სასარგებლო ნივთიერებებით გაჯერდეს.
ორი კვირის შემდეგ პროდუქტი მზად იქნება გამოსაყენებლად. მე ჩვეულებრივ პატარა ქილებში ვასხამ, სადაც კალმებს ვათავსებ. სულ რაღაც 5-7 დღის შემდეგ მათ უყალიბდება ძლიერ ფესვთა სისტემა!
ეს ხსნარი შეუცვლელია გერანიუმის, პელარგონიუმის, ქრიზანთემის და სხვა კულტურების დასაფესვიანებლად. ყურძენს და ვარდსაც კი ასე ვაფესვიანებ. ხსნარის ფერი, სხვათა შორის, მუქი გამოდის.
ვარიანტი №2
ტოტების ნაცვლად შეგიძლიათ გამოიყენოთ ტირიფის ქერქი. ახალგაზრდა ხის ქერქის ნაჭერი დააქუცმაცეთ პატარა ნაჭრებად. დაასხით 2-3 ჭიქა მდუღარე წყალი და გააჩერეთ 24 საათი. თქვენ მიიღებთ შესანიშნავ ორგანულ სასუქს, რომელიც ასტიმულირებს ფესვების ზრდას.
ქერქისგან ნაყენის მომზადება შეგიძლიათ ოდნავ განსხავებული მეთოდით. ერთ ჭიქა დაქუცმაცებულ ქერქს დაასხით 5 ლიტრი წყალი და გააჩერეთ ზუსტად 24 საათის განმავლობაში. შემდეგ გაწურეთ. მიღებული ხსნარი შეიძლება გამოყენებულ იქნას სხვადასხვა გზით.
შეგიძლიათ ეს ნარევი ნერგებს დარგვამდე დაასხუროთ. შეგიძლიათ მორწყოთ ნიადაგი კალმების ირგვლივ. ეს დააჩქარებს ფესვების ზრდის პროცესს. და, რა თქმა უნდა, თქვენ შეგიძლიათ უბრალოდ გააჩეროთ კალმები ამ ნარევში, სანამ ფესვებს არ გამოიტანს.
შეგიძლიათ გამოიყენოთ არა მხოლოდ ტირიფი, არამედ სხვა მცენარეებიც. მაგალითად, ცაცხვის ყვავილის ნაყენი ასევე ასტიმულირებს ფესვების ზრდას. მთავარია გამოიყენოთ მხოლოდ ბუნებრივი ინგრედიენტები და კალმები სწრაფად დაფესვიანდება!
ცუდია თუ არა მაღაზიაში ნაყიდი ზრდის სტიმულატორები?
ახლა ბევრმა შეიძლება იფიქროს, რომ მე ნეგატიური დამოკიდებულება მაქვს ფესვის ზრდის მაღაზიებში ნაყიდ სტიმულატორებთან. არა, მე მათ საწინააღმდეგო არაფერი მაქვს. მაღაზიაში შეძენილი მრავალი პრეპარატი მთლიანად ბუნებრივი ინგრედიენტებისგან შედგება (ძირითადად სხვადასხვა მცენარის ექსტრაქტებისგან, რაც უზრუნველყოფს ფესვთა სისტემის სწრაფ განვითარებას). ტირიფის ნაყენიც შეიძლება მიეკუთვნოს პრეპარატების ასეთ კლასს.
თუმცა ზოგი პრეპარატი შემადგენლობაში „ქიმიას” შეიცავს და ამაში ცუდი არაფერია. თუმცა ახლა მაღაზიებში ბევრი ყალბი პროდუქტი იყიდება და გამყიდველებმა ამის შესახებ თავადაც არ იციან. ასე რომ, ბევრად უკეთესია ნაყენი თავად მოამზადოთ და დარწმუნებული იყოთ მის ეფექტურობაში!
