გაზაფხულზე სუფრაზე ბევრი ახალი ხილი, ბოსტნეული და მწვანილი ხვდება. ვიტამინებს და მინერალებს მონატრებული ორგანიზმისთვის ვამზადებთ სალათებს, წვნიანებს იმ პროდუქტებით, რამაც ნაკვეთზე გაზრდა უკვე მოასწრო.
რომელია ყველაზე შესაფერისი კერძი გაზაფხულის ბოლოს? ბოლოკით, მწვანილით და არაჟნით მომზადებული სალათი, კვერცხის და მწვანე ხახვის ღვეზელი თუ სალათი ველური ნივრით? რას იტყვით მწვანე ბორშზე?
Vivien გასწავლით, როგორ მოამზადოთ მწვანე ბორში მჟაუნით. ვიტამინებით მდიდარი წვნიანი ნებისმიერ სტუმარს სასარგებლო ნივთიერებებით გაავსებს. გემრიელი და სასარგებლო წვნიანი გულგრილს არავის დატოვებს.
ბორში მჟაუნით
ინგრედიენტები:
- 1 კგ კარტოფილი
- 1 კგ ქათმის ან სხვა ხორცი
- 300 გ მჟაუნა
- 1 სტაფილო
- 1 ხახვი
- 5 კვერცხი
- 500 მლ პომიდორი
- 1 ს/კ შაქარი
- მცენარეული ზეთი შესაწვავად
- მარილი და წიწაკა გემოვნებით
- ოხრახუში, მწვანე ხახვი, კამა
მომზადების წესი:
1. ქათმის ხორცი ნაჭრებად დაჭერით. ქვაბში გადაიტანეთ, წყალი დაასხით და ხარშეთ. ადუღებისას ქაფი მოაშორეთ. ბულიონი 60 წუთი ხარშეთ.
2. ბოსტნეული შეწვით. ხახვი წვრილად დაჭერით და სტაფილო მსხვილად გახეხეთ. ტაფაზე რამდენიმე კოვზი ზეთი დაასხით, დაჭრილი ხახვი გადაიტანეთ და შეწვით, სანამ არ დარბილდება. გახეხილი სტაფილო დაუმატეთ და შეწვა გააგრძელეთ. აკონტროლეთ, რომ არ დაგეწვათ. დროდადრო აურიეთ.
3. სასურველია, სახლის პომიდორი გამოიყენოთ, თუმცა პომიდვრის პასტით შეგიძლიათ ჩაანაცვლოთ. ამ შემთხვევაში 2–3 სუფრის კოვზი პომიდვრის პასტა 500 მლ მდუღარე წყალში გააზავეთ. 500 გ ახალი პომიდორიც გამოგადგებათ. ახალი პომიდორი ხორცსაკეპში უნდა გაატაროთ. პომიდორი შემწვარ ბოსტნეულს დაუმატეთ. 10 წუთი ჩაშუშეთ, რომ ზედმეტი სითხე აორთქლდეს. წიწაკა და მარილი, ასევე შაქარი დაუმატეთ.
4. კვერცხი 10 წუთი ხარშეთ. გაცივებას დაელოდეთ, შემდეგ კუბებად დაჭერით. კარტოფილი საშუალო ზომის კუბებად დაჭერით და ბულიონს დაუმატეთ. 15 წუთი ხარშეთ.
5. მჟაუნა, კამა და მწვანე ხახვი წვრილად დაჭერით.
6. კარტოფილის მოხარშვის შემდეგ ბულიონს შემწვარი ბოსტნეული დაუმატეთ და აურიეთ. ამის შემდეგ დაუმატეთ ჯერ მჟაუნა, შემდეგ კვერცხი და დარჩენილი მწვანილი. მარილი და წიწაკა გემოვნებით დაუმატეთ და აურიეთ. 2 წუთი ხარშეთ. წვნიანი მზადაა.
7. სუფრაზე გატანამდე თითოეულ წვნიანის თეფშს ერთი კოვზი არაჟანი დაუმატეთ. ბორში მსუბუქი სიმჟავით ნებისმიერ დროს შეგიძლიათ მოამზადოთ, მაგრამ მაისში განსაკუთრებით გემრიელია.
ამ რაოდენობის ინგრედიენტებით 6 ლ ბორში გამოდის, რაც მთელი ოჯახის გამოსაკვებად საკმარისია. მწვანე ბორში მჟაუნით გემრიელი და ნოყიერი კერძია. მშიერი არავინ დარჩება.
