ბევრის თვალში უკრაინელი პოეტი და მსახიობი ტარას შევჩენკო მკაცრად და ასკეტურად გამოიყურება. ცოტამ თუ იცის, რომ შევჩენკო ცხოვრების წუთიერ სიხარულებს დიდად აფასებდა. პოეტს, როგორც უმეტესობა ჩვენგანს, გემრიელად ჭამა უყვარდა და მშობლიური ქვეყნის რეცეპტებს უპირატესობას ანიჭებდა. უმეტესობა მათგანი დღემდე შემორჩენილია. მათ შორისაა „ბორში შევჩენკო“, ასევე ცნობილი, როგორც ოდესური ბორში ჭანარით.
კერძის ისტორია – ბორშის მრავალი რეცეპტი არსებობს. უმეტესობა მათგანში ინგრედიენტებს შორის ხორცი სახელდება. ოდესელები გამოირჩევიან. ზღვისპირას მცხოვრებმა ხალხმა ხორცი თევზით ჩაანაცვლა. ასე ცნობილი კერძი ნამდვილად არ გაფუჭდება. პირიქით, ოდესური ბორშის დახვეწილი გემო განთქმულია.
ინგრედიენტები:
- 6 პატარა ჭანარი (სხვა საშუალო ზომის თევზიც გამოგადგებათ)
- 1 ს/კ ფქვილი
- 1 მსხვილი ჭარხალი
- 1 საშუალო ზომის ხახვი
- 4 საშუალო ზომის კარტოფილი
- 1 საშუალო ზომის სტაფილო
- 200 გ კომბოსტო
- 200 მლ პომიდვრის წვენი
- მზესუმზირის ზეთი
- მარილი, წიწაკა, დაფნის ფოთოლი
მომზადების წესი:
- კარგად გაწმენდილი თევზი დაამარილეთ და ფქვილში ამოავლეთ. შემდეგ ორივე მხრიდან მზესუმზირის ზეთში შეწითლებამდე შეწვით. მზა თევზი ქაღალდის პირსახოცზე გადაიტანეთ, რომ ზედმეტი ზეთი მოშორდეს.
- ჭარხალი, ხახვი, კარტოფილი და სტაფილო გათალეთ. ხახვი კუბებად დაჭერით, შემდეგ დარბილებამდე შეწვით. სტაფილო და ჭარხალი გახეხეთ, შემწვარ ხახვს დაუმატეთ, პომიდვრის წვენი დაასხით და ერთად 5-7 წუთით ჩაშუშეთ. 150 მლ წყალი დაასხით და ადუღებამდე მიიყვანეთ. შემდეგ სუსტ ცეცხლზე კიდევ 10 წუთით ხარშეთ.
- კარტოფილი პატარა კუბებად დაჭერით, ქვაბში ჩაყარეთ და 2 ლ წყალი დაასხით. 2 მწიკვი მარილი დაუმატეთ და საშუალო ცეცხლზე 20 წუთით ხარშეთ. შემდეგ დაჭრილი კომბოსტო დაუმატეთ და 10 წუთით ხარშეთ.
- ამავე ქვაბში შემწვარი ბოსტნეული გადაიტანეთ. 3 მარცვალი ბაჰარის წიწაკა, 2 დაფნის ფოთოლი, მარილი და წიწაკა გემოვნებით დაუმატეთ. სუსტ ცეცხლზე 5-7 წუთით ხარშეთ. შემწვარი თევზი დაუმატეთ და კიდევ 7-10 წუთით ხარშეთ.
ესეც ასე, „ბორში შევჩენკო“ მზადაა. ბორში ჭანარით თეფშებზე დაასხით და დახვეწილი გემოთი ისიამოვნეთ. გემრიელად მიირთვით.
