შინ მომზადებული ცომეულის მოყვარულთათვის ნაცნობია სიტუაცია, როცა კერძს რეცეპტის მიხედვით მხოლოდ კვერცხის ნაწილს, მაგალითად, გულს უმატებენ, და არ იციან, რა უყონ ცილას. ხომ არ გადააგდებთ. ცილის შენახვის მარტივი მეთოდია პატარა კონტეინერში გადასხმა და გაყინვა. თუ დრო და სურვილი გაქვთ, რომ ახლობლები საოცარი დესერტით გაანებივროთ, გიამბობთ, როგორ მოამზადოთ ბეზე.
როგორ მოვამზადოთ ბეზე – ბეზეს საფუძველია შაქართან ან შაქრის ფხვნილთან ერთად ათქვეფილი კვერცხის ცილა. ფერადი ბეზეს მისაღებად მასა რამდენიმე ნაწილად გაყავით და საკვები საღებავი დაუმატეთ. ბეზე ფრანგული რეცეპტით მხოლოდ ორი პროდუქტისგან მზადდება.
ინგრედიენტები:
- 100 გ კვერცხის ცილა
- 200 გ შაქრის ფხვნილი
მომზადების წესი:
- კვერცხის ცილები მშრალ თასში გადაიტანეთ და მიქსერით დაბალ სიჩქარეზე ათქვიფეთ. სიჩქარეს თანდათან მოუმატეთ და შაქარი დაუმატეთ. მზა ბეზე სქელი უნდა იყოს და შაქრის კრისტალებს არ შეიცავდეს.
- საცხობ ფორმას პერგამენტის ქაღალდი დააფინეთ და ბეზე კოვზით ან საკონდიტრო ტომრით გადაიტანეთ.
- ბეზე 100-120 გრადუსამდე გახურებულ ღუმელში მინიმუმ 1 საათით აცხვეთ. შემდეგ ღუმელი გამორთეთ. როცა ღუმელი ოდნავ შეგრილდება, მზა დესერტი გამოიღეთ.
ბეზეს სხვა რეცეპტები – შვეიცარიელმა კონდიტერებმა ბეზეს მომზადება ფრანგებისგან ისესხეს. მასას ათქვეფამდე წყლის ორთქლზე 50-70 გრადუსამდე აცხელებენ. იტალიელები უფრო შორს წავიდნენ და ბეზეს ცილით და შაქრის სიროფით ამზადებენ.
ინგრედიენტები:
- 100 გ კვერცხის ცილა
- 200 გ შაქრის ფხვნილი
- 100 მლ წყალი
მომზადების წესი:
- წყალი ქვაბში გააცხელეთ. შაქარი დაუმატეთ, ცეცხლს დაუწიეთ, სიროფი ხარშეთ. როცა სითხის ტემპერატურა დუღილის წერტილს 20 გრადუსში გადააჭარბებს, ქურიდან გადმოდგით.
- ამ დროში კვერცხის ცილები ათქვიფეთ. სიროფი წვრილი ნაკადივით დაუმატეთ.
- კონდიტერები ასეთ ბეზეს არ აშრობენ, არამედ დესერტებში რბილს იყენებენ. ამ მიზნით სანთურით ან გრილის ქვეშ ბრაწავენ.
როგორ მოვამზადოთ ბეზე კაკლით და შოკოლადით – ბეზეს მშრალი ინგრედიენტები (მაგალითად, კაკალი) დაუმატეთ, თუ უფრო ორიგინალური დესერტი გსურთ. ბეზე კარგად რომ ამოვიდეს, კაკალი ღუმელში ან ტაფაზე გამოაშრეთ, მაგრამ დესერტს გაცივებული დაუმატეთ. ნუში, თხილი, მიწისთხილი ან ნიგოზი შეგიძლიათ გამოიყენოთ. გემრიელი ბეზე კაკლით და შოკოლადის ნამცეცებით მოამზადეთ.
ინგრედიენტები:
- 100 გ კვერცხის ცილა
- 200 გ შაქრის ფხვნილი
- ვანილი (დანის წვერით)
- 1 ჩ/კ ლიმონის წვენი
- 20 გ სიმინდის სახამებელი
- 70 გ დაქუცმაცებული ნიგოზი
- 50 გ დაქუცმაცებული შოკოლადი
- მწიკვი მარილი
მომზადების წესი:
- ღუმელი ჩართეთ, რომ 100-150 გრადუსამდე გახურდეს. კვერცხის ცილები სუფთა თასში მიქსერით ათქვიფეთ, მწიკვი მარილი დაუმატეთ. ოთახის ტემპერატურის პროდუქტები გამოიყენეთ. შემდეგ სიჩქარე გაზარდეთ. ამოსულ ქაფს თანდათან შაქრის ფხვნილი და ვანილი დაუმატეთ. ჰაეროვანი მასის ათქვეფა გააგრძელეთ.
- ლიმონის წვენი ბოლოს დაუმატეთ. მყარი ქაფი უნდა მიიღოთ. სიმინდის სახამებელი დაუმატეთ და აურიეთ.
- კაკალი და შოკოლადი დაუმატეთ. კარგად აურიეთ.
- საცხობ ფორმას პერგამენტის ქაღალდი დააფინეთ და კოვზით ბეზე გადაიტანეთ. გახურებულ ღუმელში 30 წუთით მოათავსეთ. ცხობისას ღუმელის კარი არ გააღოთ.
- ბეზეს გამოღებამდე ღუმელის კარი ოდნავ შეაღეთ, რომ ცივი ჰაერი ღუმელში თანდათან შევიდეს. რამდენიმე წუთით მოიცადეთ და დესერტი გამოიღეთ.
არ იზარმაცოთ და ახლობლები ასეთი დესერტით გაახარეთ. ტკბილ ცხოვრებას და გემრიელ დესერტებს გისურვებთ.
