ზამთარში ქუდის დახურვა არ მიყვარს, რადგან მის ქვეშ ვარცხნილობა ფუჭდება და თმაც სწრაფად ცხიმიანდება. არადა თავის აქსესუარის გარეშე სიცივეში ვერ გახვალ. ნამდვილი დილემაა! Vivien გიამბობთ, რა გააკეთოთ, რომ თმა ქუდის ქვეშ არ გაცხიმიანდეს და ვარცხნილობა მოწესრიგებული დარჩეს. ტრიქოლოგების აზრით, თავსაბურავი თმის მდგომარეობაზე ნამდვილად აისახება. თმა სწრაფად ჭუჭყიანდება და მოცულობას კარგავს. ყველა ქუდი ასეთ უარყოფით გავლენას ახდენს ვარცხნილობაზე? პასუხს ჩვენს სტატიაში იპოვით.
როგორ ვატაროთ ქუდი ზამთარში, რომ თმა არ გაცხიმიანდეს
ყველაფერი ზამთრის ქუდის შესახებ – სპეციალისტები თვლიან, რომ ვიწრო ქუდის ტარება თმის დაბინძურების პროცესს აჩქარებს. სინთეტიკური ქსოვილისგან დამზადებული ქუდი ამას ხელს უწყობს. თმა ქუდის ქვეშ სწრაფად რომ არ გაცხიმიანდეს, სწორად შეარჩიეთ. ძალიან ვიწრო სინთეტიკური მოდელები არ შეიძინოთ. ასეთი მასალა ნაკლებად გაგათბობთ, ვიდრე ნატურალური, თან ვარცხნილობას აფუჭებს. თავსაბურავზე ფულის დაზოგვა არ ღირს. ვიწრო ქუდის რამდენიმე საათით ტარება სკალპის ცხიმის მომატებულ გამომუშავებას იწვევს. თავი თითქოს ქუდის ქვეშ იხრჩობა. შედეგად, ლამაზი თმის ნაცვლად ცხიმიანს იღებთ. ტრიქოლოგები გირჩევთ, რომ არჩევანი უფრო ფართო მოდელებზე გააკეთოთ.
აკურატული ვარცხნილობა – თმა ქუდის ტარების შემდეგ მოვლილი და მოწესრიგებული რომ იყოს, ვარცხნილობა სწორად შეარჩიეთ. სხვადასხვა ნაწნავი საუკეთესო ვარიანტია. ისეთი ვარცხნილობები, როგორიცაა ფრანგული ნაწნავი ან თევზის კუდი, თმის აბურდვისგან დაგიცავთ. თუ ხუჭუჭა თმა გაქვთ და ნაწნავი დაუდევრად გამოიყურება, ოდნავ სველ თმაზე დაწვნა სცადეთ.
მოცულობის გაზრდა – გაშლილმა თმამ თავის ზედა ნაწილში მოცულობა რომ არ დაკარგოს, სპეციალური მეთოდით გაიშრეთ. დაბანის შემდეგ ფენი გამოიყენეთ. ჯერ ჩვეული მეთოდით გაიმშრალეთ, შემდეგ პროცესი ცივი რეჟიმით დაასრულეთ. ასე ქუდი მოცულობას არ გააფუჭებს. გახსოვდეთ, რომ ასეთი აქსესუარი სველ თმაზე არ უნდა დაიხუროთ, რადგან თმა ძლიერ დაბრტყელდება. აუცილებლად ნატურალური მასალისგან დამზადებული ქუდი შეარჩიეთ. ამ შემთხვევაში თმა გაცილებით დიდხანს სუფთა დარჩება.
