ცივ ამინდში საკუთარი თავის და ახლობლების შინ გამომცხვარი ცომეულით გახარება გვსურს. ამავდროულად, დიდხანს ქურასთან დგომა არ გვინდა. ამ შემთხვევაში, სწრაფი და გამოცდილი რეცეპტები დაგეხმარებათ. Vivien გიამბობთ, როგორ გააკეთოთ არომატული კონვერტები ვაშლით. საოცარი არომატი და ნაზი გემო აქვს. დარწმუნებული ვართ, მოგეწონებათ.
კონვერტები ვაშლით – მომზადების სხვადასხვა მეთოდი არსებობს. ეს არა მხოლოდ ცომს, არამედ შიგთავსს ეხება. გირჩევთ, რომ ფხვიერი ცომი არაჟნით და კარაქით გააკეთოთ. ასე ცომეული ნაზი და რბილი გამოვა. იდეალურია ჩაიზე მისაყოლებლად.
ცომის ინგრედიენტები:
- 330 გ ხორბლის ფქვილი
- 200 გ კარაქი
- 140 გ არაჟანი (15%)
შიგთავსის ინგრედიენტები:
- 5-6 ვაშლი
- 120 გ შაქარი
- 20 გ მანანის ბურღული
- დარიჩინი გემოვნებით
მომზადების წესი:
- პირველ რიგში, ხილის შიგთავსს მიხედეთ. ვაშლი გათალეთ და პატარა კუბებად დაჭერით. მშრალ ტაფაზე მოათავსეთ, შაქარი დაუმატეთ და აურიეთ. ვაშლი სუსტ ცეცხლზე თუშეთ, სანამ რბილი არ გახდება და მთელი სითხე არ აორთქლდება.
- მზა ვაშლს მანანის ბურღული დაუმატეთ. ასე უფრო სქელ შიგთავსს მიიღებთ და კონვერტიდან არაფერი გამოვა. დარიჩინი გემოვნებით დაუმატეთ. კარგად აურიეთ და ქურიდან გადმოდგით.
- ცომისთვის კუბებად დაჭრილი ცივი კარაქი და ხორბლის ფქვილი აურიეთ. ფქვილის ნაფშვენს არაჟანი დაუმატეთ და ცომი მოზილეთ. სამზარეულოს კომბაინის გამოყენება მოსახერხებელია, მაგრამ ხელითაც შეგიძლიათ. ცომს დიდხანს მოზელა არ სჭირდება. როგორც კი შეიკვრება, მზადაა.
- ცომი პარკში შეინახეთ და 30-60 წუთით მაცივარში დაასვენეთ. აუცილებელი ეტაპი არაა.
- მზა ცომი 2-3 მმ სისქის მართკუთხედად გააბრტყელეთ. დროდადრო ზემოდან ფქვილი მოაყარეთ, რომ საგორავს არ მიეკრას. ცომის კიდეები გადაჭერით, რომ სწორი მართკუთხედი მიიღოთ. ცომიდან თანაბარი ზომის კვადრატები გამოჭერით. მაგალითად, 8×8 ზომის კვადრატები.
- თითოეული კვადრატის ცენტრში ცოტა ცივი შიგთავსი მოათავსეთ. ურთიერთსაპირისპირო კიდეები შეკარით ისე, რომ კონვერტის ფორმა მიიღოთ.
- პერგამენტდაფარებულ საცხობ ფორმაზე გადაიტანეთ და 170 გრადუსზე 30-40 წუთით აცხვეთ. კონვერტები კარგად უნდა შეწითლდეს. მზა ცომეული სურვილის შემთხვევაში შაქრის ფხვნილით გააფორმეთ. მზადაა!
შიგთავსად ვაშლის ნაცვლად სხვა ხილი შეგიძლიათ გამოიყენოთ. მაგალითად, მსხალი ან გოგრა. მთავარია, სქელი შიგთავსი იყოს და ცომიდან არ გადმოიღვაროს. ექსპერიმენტები ჩაატარეთ და კონვერტში ბანანის ან შოკოლადის ნაჭერი ჩადეთ. დარწმუნებული ვართ, ძალიან გემრიელი გამოგივათ. კონვერტები ვაშლით ფენოვანი ცომისგან შეგიძლიათ გააკეთოთ. თუ დრო არ გაქვთ, ასეთი ცომი მაღაზიაში იყიდეთ და ჩვენი რეცეპტის მიხედვით მოამზადეთ. ცხობის წინ ათქვეფილი კვერცხი ან რძე შეგიძლიათ წაუსვათ.
