წვიმიანი შემოდგომა გვაქვს, ანუ ბევრი სოკო იქნება. მეუღლე წყნარი ნადირობის შემდეგ სავსე კალათებით დაბრუნდა. რა თქმა უნდა, ამდენს ერთდროულად ვერ შევჭამთ. სწორედ ამიტომ, ქილებში ვინახავ, სოკოსთვის სწორ მარინადს ვამზადებ და ზამთრისა და გაზაფხულისთვის ვიმარაგებ! დამარინადებული ტყის სოკო ზამთარში ძალიან გემრიელია! გემრიელი და მარტივი დანამატია ნებისმიერი კერძისთვის. რამდენიმე ქილას ზამთრის დღესასწაულებისთვის აუცილებლად ვინახავ. გირჩევთ, რომ სოკო ზამთრისთვის შეინახოთ, რომ სუფრაზე გემრიელი წასახემსებელი დადოთ.
რომელი მარინადი ავირჩიოთ სოკოსთვის: 3 რეცეპტი
1. მარინადი მანჭკვალას, დუმასოკოსა და თეთრი სოკოსთვის
ინგრედიენტები:
- 1 ლ წყალი
- 2 ს/კ შაქარი
- 4 ს/კ მარილი
- 3 დაფნის ფოთოლი
- 6 მარცვალი ბაჰარის წიწაკა
- 4 კვირტი მიხაკი
- 0,5 ჩ/კ დაფქული დარიჩინი
- 4 ს/კ ძმარი (9%)
მომზადების წესი:
- წყალი ადუღებამდე მიიყვანეთ. შაქარი და მარილი დაუმატეთ, აურიეთ და წყლის ხელმეორედ ადუღებას დაელოდეთ.
- სანელებლები და დაფნის ფოთოლი დაუმატეთ, მარინადი ისევ 3 წუთით ხარშეთ.
- ძმარი დაუმატეთ და მაშინვე ქურიდან გადმოდგით.
- მზა მარინადი სოკოს გასტერილებულ ქილებში ჩაასხით და მოხუფეთ.
2. მარინადი მიქლიოსთვის
ინგრედიენტები:
- 1 ლ წყალი
- 2,5 ს/კ მარილი
- 2 ს/კ შაქარი
- 10 მარცვალი შავი წიწაკა
- 5 კვირტი მიხაკი
- 10 კბილი ნიორი
- 3 ხახვი
- 1 ჩ/კ მარცვალი მდოგვი
- 3 ქოლგა კამა
- 4 ჩ/კ ძმარი (9%)
- მზესუმზირის ზეთი გემოვნებით
მომზადების წესი:
- წყალი ცეცხლზე დადგით და ადუღებამდე მიიყვანეთ. დანარჩენი ინგრედიენტები (ძმრის გარდა) დაუმატეთ. მარინადი 20 წუთით ხარშეთ.
- ძმარი დაასხით და ქურიდან გადმოდგით. სითხე გადაწურეთ.
- სოკოს ცხელი მარინადი დაასხით და ქილები 20 წუთით გაასტერილეთ.
- თითოეულ ქილას თითო ჩაის კოვზი მზესუმზირის ზეთი დაუმატეთ და მოხუფეთ.
3. უნივერსალური მარინადი სოკოსთვის
ინგრედიენტები:
- 800 მლ წყალი
- 20 მლ ძმარი (6%)
- 5 ჩ/კ მარილი
- 2,5 ს/კ ძმარი
- 5 დაფნის ფოთოლი
- 3 კვირტი მიხაკი
- 5 მარცვალი ბაჰარის წიწაკა
- 10 მარცვალი შავი წიწაკა
მომზადების წესი:
- წყალს მარილი და შაქარი დაუმატეთ, ნარევი ადუღებამდე მიიყვანეთ.
- დანარჩენი ინგრედიენტები დაუმატეთ და მარინადი 2 წუთით ხარშეთ.
- ცხელი მარინადი სოკოს დაასხით. ქილები გაასტერილეთ და სუფთა თავსახურებით მოხუფეთ.
გირჩევთ, რომ სოკო ზამთრისთვის სხვადასხვა ქილაში დაამარინადოთ. დიდი ქილები სადღესასწაულო სუფრაზე გახსენით. პატარა ქილები ოჯახური ვახშმისთვის იდეალურია. ქილების და თავსახურების კარგად გასტერილება არ დაგავიწყდეთ. მოხუფვის შემდეგ ქილები გადააბრუნეთ, შეფუთეთ და ბოლომდე გაგრილება აცადეთ. სოკოს ნამზადი ოთახის ტემპერატურაზე სიბნელეში კარგად ინახება.
