რა სირთულეებს შეიძლება გადააწყდეთ ბოსტნეულის მომზადებისას? დასამუშავებლად ისეთი რთული არაა, როგორც თევზი, ხორცი ან ცომეული. იდეალური ბოსტნეულის მოსამზადებლად თერმოდამუშავების საბაზისო ცოდნა და თითოეული პროდუქტის თავისებურებები უნდა იცოდეთ.
ბოსტნეული ღუმელში – შესანიშნავი გამოსავალია, თუ საჭმლიდან მაქსიმალური სარგებლის და სიამოვნების მიღება გსურთ. გამომცხვარი ბოსტნეული ლამაზად გამოიყურება და ვიტამინებით სავსეა, თან ძალიან გემრიელია, განსაკუთრებით ხარისხიანი სანელებლებით. Vivien გიზიარებთ რჩევებს, როგორ გამოაცხოთ ბოსტნეული ისე, რომ საცხობ ფორმას არ დაეკროს და არ გამოშრეს.
პროფესიონალი მზარეულების 5 ხრიკი – ერთ–ერთი პოპულარული რესტორნის მზარეულს გავესაუბრეთ და გავიგეთ, როგორ შევინარჩუნოთ გემო და ყველა სასარგებლო ნივთიერება, რომლითაც სეზონური ბოსტნეული მდიდარია.
- სწორად დაჭრა – ბოსტნეულის კერძის თანაბრად გამოცხობა ნაჭრების ზომაზეა დამოკიდებულია. რაღაც მომენტში ღუმელში ტემპერატურაზე უფრო მნიშვნელოვანია. სწორედ ამიტომ, ყურადღება მიაქციეთ, რომ ბოსტნეული ზუსტად ერთი და იმავე ზომის ნაჭრებად იყოს დაჭრილი.
- მცენარეული ზეთის დამატება – სანამ ბოსტნეულს ღუმელში მოათავსებთ, ნებისმიერი ზეთი მსუბუქად შეასხურეთ ან წაუსვით. კონკრეტული ბოსტნეულის მიხედვით სხვადასხვა რაოდენობის ზეთი დაგჭირდებათ. მაგალითად, ბროკოლს, სოკოს და ბადრიჯანს მეტი ზეთი სჭირდება. ფორებიანი ბოსტნეული ცხიმს უფრო აქტიურად იწოვს, ვიდრე ძირნაყოფი. თუ შემწვარი ქერქის მიღება გსურთ, ბოსტნეული არ გათალოთ. სამზარეულოს ჯაგრისით დაამუშავეთ, კარგად გარეცხეთ და გაამშრალეთ. ეს საკმარისია. სტანდარტულ საცხობ ფორმას 2 ს/კ მზესუმზირის (ზეითუნის) ზეთი წაუსვით, რომ არაფერი დაიწვას.
- მორევა – ეს იმას არ ნიშნავს, რომ ღუმელის კარი მუდმივად უნდა გააღოთ, გვერდით იდგეთ და სპატულით აურიოთ. თუმცა ხანდახან მორევა აუცილებელია. ორჯერ საკმარისია, რომ ბოსტნეული ყველა მხრიდან გამოცხვეს. ზომიერი მორევით თანაბარ ოქროსფერ შეფერილობას მიიღებს.
- ოპტიმალური ტემპერატურა – დაბალ ტემპერატურაზე ოქროსფერი ბოსტნეულის მიღება რთულია. ბოსტნეულის გამოსაცხობად 180-200 გრადუსი ოპტიმალურია. ამ რეჟიმზე გარედან კარამელიზებული და ხრაშუნა, ხოლო შიგნით რბილი გამოვა.
- საცხობი ფორმა – ბუნებრივია, მაყალზე მომზადებული ბოსტნეულის გემოს ვერ შეედრება, მაგრამ ახლა უფრო თანამედროვე ვარიანტს, ღუმელს, განვიხილავთ. ბოსტნეული ლითონის საცხობ ლანგარზე უკეთ ცხვება, ვიდრე მაღალგვერდებიან ტაფაზე ამ საცხობ ფორმაში. გახსოვდეთ: რაც უფრო დაბალია გვერდები, ორთქლი თავად ჭურჭელს ნაკლებად ეხება. ასე „ბოსტნეულის ფაფას“ არ მიიღებთ, არამედ ცალკეული ნაჭრებით ისიამოვნებთ. ბოსტნეული ერთმანეთს არ გადაადოთ. მათ შორის ცოტა სივრცე დატოვეთ. ასე ღუმელში ერთმანეთს არ შეეწებება, თანაბრად გამოცხვება და საკმაოდ მადისაღმძვრელი გარეგნობა ექნება.
და ბოლოს: გამოცხობამდე მარილის მოყრა საჭირო არაა! ასე წვენს ნაადრევად გამოყოფს, რბილი გახდება და ლამაზი ქერქით არ დაიფარება. მარილი მხოლოდ მზა კერძს სუფრაზე გატანის წინ მოაყარეთ.
