ზაფხულში არა მხოლოდ ციგები, არამედ ზამთრისთვის კონსერვები უნდა მოამზადოთ. მოგვიანებით ვახშამზე დამარინადებული კიტრის ხრაშუნი ერთი სიამოვნებაა! სხვათა შორის, მთელი ნაყოფი ლამაზად გამოიყურება, მაგრამ კუბებად შენახული უფრო მოსახერხებელია. ასეთი მეთოდი კარგია იმით, რომ გადამწიფებული, მოხრილი და უშნო ნაყოფიც შეგიძლიათ გამოიყენოთ. დაჭრილი ბოსტნეული მომავალში დროს დაგიზოგავთ, როცა ვინეგრეტის, ოლივიეს ან რასოლნიკის მომზადებას დააპირებთ. რაც მთავარია, ქილების სტერილიზაცია არ სჭირდება.
ინგრედიენტები:
- 1 კგ კიტრი
- 20 მარცვალი შავი წიწაკა
- 1 დაფნის ფოთოლი
- 4 კბილი ნიორი
- 1 ცხარე წიწაკა
- 1 კონა კამა
- 1 ფოთოლი პირშუშხა
მარინადის ინგრედიენტები:
- 1 ლ წყალი
- 70 გ მარილი
- 50 გ შაქარი
- 70 გ ძმარი
მომზადების წესი:
გირჩევთ, რომ დასაკონსერვებლად 0,5–ლიტრიანი ქილები გამოიყენოთ. 1 კილოგრამი კიტრი 4 ასეთი ქილის გასავსებად საკმარისია.
- კიტრი სასურველი ზომის კუბებად დაჭერით. ქილის ძირში 5 მარცვალი შავი წიწაკა, დაფნის ფოთოლი და დაჭრილი ნივრის კბილი მოათავსეთ. ზემოდან ცოტა წიწაკა, კამის ტოტი ქოლგით და პირშუშხას ფოთოლი დაუმატეთ. ქილა დაჭრილი კიტრით მჭიდროდ გაავსეთ.
- ჩაიდანში 1 ლ წყალი აადუღეთ. კიტრს მდუღარე წყალი დაასხით, ზემოდან მოსახუფი თავსახური დააფარეთ. პირსახოცში შეფუთეთ და 20 წუთით გააჩერეთ.
- 20 წუთის შემდეგ სითხე ქილიდან ქვაბში ჩაასხით, რომელშიც მარინადს მოამზადებთ. ჩაიდანში დარჩენილი წყალი (რეცეპტი 1 ლ მარინადზეა გათვლილი) დაუმატეთ. 50 გ შაქარი და 70 გ ქვის მარილი დაუმატეთ. მარინადი ადუღებამდე მიიყვანეთ და მარილისა და შაქრის გახსნას დაელოდეთ.
- ახლა 70 გ ძმარი დაუმატეთ და ადუღებამდე მიიყვანეთ. მარინადი ქილაში კიტრის კუბებს დაასხით და მაშინვე მოხუფეთ. ქილები გადააბრუნეთ, პირსახოცში კარგად შეფუთეთ და სრულ გაგრილებამდე გააჩერეთ.
რეცეპტი სპეციალურად სალათსა და წვნიანში გამოყენებაზეა გათვლილი. მარინადი საკმაოდ პიკანტურია. თუ მძაფრი გემო არ გიყვართ, მაშინ მარილის, შაქრის და ძმრის რაოდენობა 20%–ით შეამცირეთ. გახსოვდეთ, რომ ამ შემთხვევაში კიტრს მდუღარე წყალი 2–ჯერ უნდა დაასხათ, ხოლო მარინადი მესამედ.
