„მინდა დანდურა–ყვავილი დავრგო. იცი ასეთი მცენარე?“ – მკითხა დაქალმა. იტალიელმა დეიდამ სარეველით სალათის მომზადება ასწავლა. იტალიაში დანდურს ამარილებენ, ამწნილებენ და ამჟავებენ კიდეც. Vivien გიამბობთ, რა სასარგებლო თვისებები აქვს დანდურს და გიზიარებთ ამ სარეველით სალათის მომზადების რეცეპტს. მცენარე წვნიანს და კვერებს შეგიძლიათ დაუმატოთ!
დანდურა–ყვავილი
ზოგი თვლის, რომ დანდური სარეველაა, რომლის ყლორტები, თუ დროულად არ ამოთხრით, 25 წელი ცოცხლობს. სინამდვილეში, საოცარი ბალახია.დანდური უძველესი დროიდან ცნობილია. ძველი ეგვიპტელები, ბერძნები და რომაელები მას საკვებად ხშირად მოიხმარდნენ. ჰიპოკრატე, პლინიუსი და სხვა მეცნიერები მცენარეს სხვადასხვა უსიამოვნების წინააღმდეგ იყენებდნენ, ხოლო შუა საუკუნეებში არაბები მას კურთხეულად თვლიდნენ.მცენარის მიწისზედა ნაწილი შეიცავს ცილებს, შაქარს, მიკროელემენტებს (რკინა, მანგანუმი, სპილენძი, ნიკელი, თუთია), მაკროელემენტებს (კალიუმი, კალციუმი, მაგნიუმი, ნატრიუმი). დანდური ისპანახზე გაცილებით მეტ ალფა და გამა ლინოლენურ მჟავებს შეიცავს.
დანდურს ცოტა მწკლარტე და სასიამოვნო გემო აქვს, ისპანახის და მჟაუნას გემოს ჰგავს. ახალგაზრდა ყლორტს ზომიერი სიცხარე აქვს. საკვებად გამოიყენება ყვავილობამდე მოკრეფილი ფოთლები და ყლორტების ახალი, ზედა ნაწილები. უმად ან მოხარშული შეგიძლიათ მიირთვათ. ბოსტნის დანდურის ძველ ღეროებს უმატებენ წვნიანებს და მოთუშულ კერძებს, ხოლო სქელ წვნიან ღეროებს ამწნილებენ.დანდური განსაკუთრებით პოპულარულია ამიერკავკასიაში, შუა აზიასა და ხმელთაშუა ზღვის ქვეყნებში. ასევე მოთხოვნადია საფრანგეთში, იტალიასა და თურქეთში.ყვავილობის შემდეგ ფოთლები უხეშდება, მაგარი და საკვებად უვარგისი ხდება. სწორედ ამიტომ, დანდურს სეზონზე რამდენჯერმე რგავენ. მისგან წვნიანებს, პიურეს, სალათებს ამზადებენ. ინტერნეტში დანდურის მწნილის ბევრი რეცეპტი შეგხვდებათ, რადგან დამარინადებული დანდური ხორციან კერძებზე მისაყოლებლად შეუდარებელია. ჩვენ დანდურის სალათის რეცეპტს გიზიარებთ.
დანდურის სალათი
ინგრედიენტები:
- 2 კონა დანდური
- 200 გ ნატურალური იოგურტი
- 2 კბილი ნიორი
- 3 ს/კ ზეითუნის ზეთი
- 0,5 ლიმონი
- 0,5 ჩ/კ მარილი
მომზადების წესი:
- მცენარე გადაარჩიეთ და კარგად გარეცხეთ. სალათში მხოლოდ ახალი, მწვანე ღერო და ფოთლები გამოიყენეთ. კარგად გაამშრალეთ.
- სოუსის მოსამზადებლად იოგურტს ზეითუნის ზეთი, მარილი და ნახევარი ლიმონის წვენი დაუმატეთ. ნიორი დააქუცმაცეთ. ერთგვაროვანი მასის მიღებამდე სათქვეფით აურიეთ.
- სუფრაზე გატანის წინ მწვანილს იოგურტის სოუსი მოასხით. მაგიდაზე ცივი სალათი გაიტანეთ. გემრიელად მიირთვით.
ბლანშირებული დანდურის სალათი ნიორთან, ზეითუნის ზეთთან და ქინძთან ერთად ძალიან გემრიელია.დანდურა–ყვავილი წელს აივანზე უნდა დავრგო. სწრაფად იზრდება, მინიმალური მოვლა სჭირდება. მთავარია, რომ ქოთანი მზიან მხარეს მოათავსოთ. სხვათა შორის, ბევრი ნაცნობი დანდურს გაზონად ან ალპური ბორცვისთვის იყენებს. გაგისინჯავთ დანდური? მოგწონთ ეს მცენარე?
