Vivien გთავაზობთ ვარჯიშების ნაკრებს, რომელიც სარეაბილიტაციო ცენტრის სამკურნალო ვარჯიშის სპეციალისტებმა შეიმუშავეს. ვარჯიშები აუცილებლად დაწოლილმა და ნელი მოძრაობებით უნდა შეასრულოთ – ნაკლები ამპლიტუდით ან ნაკლები ხანგრძლივობით მტკივნეულ მხარეს. ერთსა და იმავ დროს, 25-30 წუთით ივარჯიშეთ, ვარჯიშებს შორის დაისვენეთ.
- საწყისი პოზა: ზურგზე დაწოლილი. იდაყვებში მოხრილი ხელები გულმკერდთან დაიდეთ. მკერდი მოხარეთ, თითქოსდა ნახევარ ხიდს აკეთებთ. ამ პოზაში გაჩერდით და საწყის პოზას დაუბრუნდით, მოდუნდით. ვარჯიშის განმეორების ოპტიმალური რაოდენობა – 7-8-ჯერ.
- საწყისი პოზა: ზურგზე დაწოლილი. ფეხები მუხლებში მოხარეთ, ხელები ტანის გასწვრივ. მენჯი ზემოთ ნელ–ნელა ასწიეთ, დუნდულები დაჭიმეთ. ამ პოზაში გაჩერდით, ზურგის და წელის კუნთები დაჭიმეთ, შემდეგ დაუშვით. 7-8-ჯერ გაიმეორეთ.
- საწყისი პოზა: ზურგზე დაწოლილი. ფეხები გამართული, ხელები იატაკზე დადებული. ზურგის კუნთები დაჭიმეთ და რამდენიმე სმ–ით იატაკიდან აწევა სცადეთ, ხელებს და მხრებს დაეყრდენით. 3-4-ჯერ გაიმეორეთ.
- საწყისი პოზა: ზურგზე დაწოლილი. ხელები თავქვეშ. ერთი ფეხი მუხლში მოხარეთ, მკერდთან მიიტანეთ, გაშალეთ და დაუშვით. ვარჯიში თითოეულ ფეხზე 6-7-ჯერ გაიმეორეთ.
- საწყისი პოზა: ზურგზე დაწოლილი. მარცხენა ხელი და მარცხენა ფეხი ერთდროულად ასწიეთ, 8 წამით გაჩერდით და დაუშვით. იგივე მარჯვენა ხელსა და მარჯვენა ფეხზე გაიმეორეთ. 6-7-ჯერ გაიმეორეთ.
- საწყისი პოზა: ზურგზე დაწოლილი. ხელები და ფეხები გამართული. ერთი გამართული ფეხი ზემოთ ასწიეთ, მეორე მუხლში მოხარეთ. 10-20 წამით ამ პოზაში გაჩერდით. ნელ–ნელა დაუშვით და ვარჯიში გაიმეორეთ ისე, რომ მოხრილი და გამართული ფეხები შეცვალოთ. 7-8-ჯერ გაიმეორეთ.
- საწყისი პოზა: მუცელზე დაწოლილი. ხელისგულები ყურებზე მიიდეთ, ტანის ზედა ნახევარი მაღლა ასწიეთ, რამდენიმე წამით გაჩერდით და საწყის პოზას დაუბრუნდით. 5-6-ჯერ გაიმეორეთ.
- საწყისი პოზა: მუცელზე დაწოლილი. იდაყვებში მოხრილი ხელებით, ხელისგულებით იატაკს მკერდის დონეზე დაეყრდენით. ტანის ზედა ნაწილი ზემოთ ასწიეთ და მოხარეთ. დაუშვით. 7-8-ჯერ გაიმეორეთ.
- საწყისი პოზა: მუცელზე დაწოლილი. ხელები გვერდებზე გაშლილი, მოდუნებული, ფეხები მუხლებში მოხრილი. ფეხები აქნიეთ.
- ოთხზე დადექით, ხელისგულები მხრების სიგანეზე. მენჯი უკან გაჭიმეთ, იატაკზე დაეშვით, შემდეგ წინ მოძრაობა გააკეთეთ, თითქოსდა დაბალი ღობის ქვეშ გასრიალდით. მკერდით იატაკზე გასრიალდით და გასწორდით. 8-10-ჯერ გაიმეორეთ.
- ოთხზე დადექით, იდაყვებით იატაკზე წინ და უკან იარეთ. ზურგი გამართული გქონდეთ.
- ოთხზე დადექით. მუხლებით იატაკზე მარჯვნივ და მარცხნიავ იარეთ. 4-6-ჯერ გაიმეორეთ.
