სავარჯიშო დარბაზში 3 თვე სიარულის შემდეგ მივხვდი, რომ ინდივიდუალურ გაკვეთილებზე ბიუჯეტის დიდ ნაწილს ვხარჯავ. იმის გათვალისწინებით, რომ პარალელურად ვმუშაობ და ბავშვებს ვუვლი, დასასვენებლად დრო კატასტროფულად არ მყოფნის. სწორედ ამიტომ, შემოდგომის დადგომისთანავე სახლში ვარჯიშზე გადავედი. წვრილი წელის მისაღებად ვარჯიშებს იმპროვიზირებული ტრენაჟორით ვაკეთებ.მწვრთნელმა საძულველი გვერდების მოსაშორებლად და მუცლის დასაჭიმად ზოგიერთი პროდუქტის შეზღუდვა მირჩია. განსაკუთრებით, ცომეულის და შებოლილი ძეხვის გამო ვიტანჯები. როგორც სპეციალისტმა მითხრა, დიეტა იდეალური ფორმისკენ მიმავალი გზის მხოლოდ ნაწილია. Vivien გთავაზობთ ეფექტურ ვარჯიშებს წვრილი წელის მისაღებად, რომელთაც სახლის პირობებში შეასრულებთ.
ჩაჯდომა აწეული ფეხით
სწორად დადექით, მუხლები ოდნავ მოხარეთ. ერთი ფეხი უკან დადებულ სკამს დაადეთ. ნელა ჩაჯექით და ამავე პოზაში ადექით. 15-20-ჯერ შეასრულეთ. ამის შემდეგ ფეხი შეცვალეთ. ვარჯიში მარტივი არაა, გამძლეობას და წონასწორობას მოითხოვს. მისი წყალობით ბარძაყების კუნთების ელასტიურობას გაზრდით, კვადრიცეპსებზე იმუშავებთ.
სკამზე სიარული
სკამი თქვენ წინ დადგით. ერთი ფეხი სკამს დაადეთ, ტანი ზემოთ ასწიეთ. მეორე ფეხი უკან გაწიეთ. ქვემოთ ჩადით და ფეხი შეცვალეთ. მნიშვნელოვანია, რომ მუცელი და დუნდულები დაჭიმული იყოს. ვარჯიში 3 წრეზე 20-ჯერ შეასრულეთ. ამ ვარჯიშით მუცლის, ფეხების და ბარძაყების კუნთებს გაავარჯიშებთ.
„გადაბრუნებული“ აზიდვები სკამიდან
ზურგს უკან სკამი დადგით, ორივე ხელით სკამის საჯდომს დაეყრდენით. ფეხი ერთმანეთთან ახლოს დადგით, მუხლებში ოდნავ მოხარეთ. ტანი ზემოთ ასწიეთ, ხელები გამართეთ. მუცელი ვარჯიშის დროს დაჭიმული უნდა იყოს. 3 წრეზე 10-15-ჯერ შეასრულეთ. ვარჯიშის დახმარებით ჩამოწეულ გვერდებს მოიშორებთ, ასევე ზურგს, ხელებს და მხრებს გააძლიერებთ.
გასაჭიმი ვარჯიში
ხელებით სკამის საჯდომს დაეყრდენით, ფეხები უკან გაშალეთ, იატაკს მხოლოდ თითის წვერებით დაეყრდენით. პოზიცია შეინარჩუნეთ, მარჯვენა მუხლი მარცხენა იდაყვამდე აიტანეთ. მარჯვენა ფეხი უკან გამართეთ, შემდეგ მარცხენა მუხლი მარჯვენა იდაყვამდე მიიტანეთ. ვარჯიში 3 წრეზე 15 გამეორებით შეასრულეთ. ვარჯიში წელის და დუნდულების კორექციას, ასევე კუნთების გაძლიერებას ხელს უწყობს.
გვერდითი აწევა
სკამის გვერდით დადექით, რომ ხელით მის ზურგს დაეყრდნოთ. მარჯვენა ხელი სკამის ზურგს დაადეთ, მარცხენა ზემოთ ასწიეთ. მარცხენა ფეხი მარჯვენა ფეხს დააშორეთ და გვერდულად ზემოთ ასწიეთ. მარცხენა ხელი ქვემოთ ფრთხილად დაუშვით, ამავდროულად მარცხენა ფეხი ზემოთ ასწიეთ. შუაში უნდა შეხვდნენ.საწყის პოზას დაუბრუნდით და ვარჯიში კიდევ 15-ჯერ შეასრულეთ. ამის შემდეგ მხარე შეცვალეთ. ვარჯიში მუცლის, წელის და დუნდულების კუნთებისკენაა მიმართული.
ვარჯიში რომ არ დაგეზაროთ, ოჯახის წევრებიც აიყოლიეთ. ასე შეგიძლიათ ერთად მუსიკა შეარჩიოთ და სასარგებლო წასახემსებელი მოამზადოთ. თქვენ ვარჯიშობთ სახლში? რომელ ვარჯიშებს ანიჭებთ უპირატესობას წელის დასაწვრილებლად? გაგვიზიარეთ თქვენი მეთოდები!
