ძალიან ხშირად წონის დაკლებისას ხელების ზონა ბოლოს ხდება. რაც ყველაზე საწყენია, სხეულის ეს ნაწილი ერთ–ერთი ყველაზე თვალშისაცემი ზონაა.
როგორ ჩავიცვათ საყვარელი კაბა და საკუთარი ხელების არ შეგვრცხვეს?
დღეს Vivien-ის რედაქცია სწორედ ამ პრობლემის შესახებ გიამბობთ და გაჩვენებთ ვარჯიშებს, რომლებიც ხელის კუნთების მარტივად გამკრივებაში დაგეხმარებათ.
დავიწყოთ:
ერთადერთი, რაც გჭირდებათ, ეს გადაწყვეტილების მიღებაა, რომ სხეულის გაუმჯობესება ნამდვილად გსურთ.
ვარჯიში მარტივი, მაგრამ ეფექტურია, შედეგს უკვე 1–2 კვირაში შეამჩნევთ, ეფექტს კი პირველივე დღეს იგრძნობთ. მთავარი წესი ვარჯიშის შესასრულებლად – მხრები და ზურგი გამართული უნდა გქონდეთ.
ეს ძალიან მნიშვნელოვანია 2 მიზეზით:
- ვარჯიშში რომ საჭირო კუნთების ჯგუფი ჩაერთოს;
- მოხრილობა შეამციროთ და დგომა გააუმჯობესოთ. დგომა ხომ ჯანმრთელობის და წარმატების გარანტიაა.
ვარჯიში №1
- სავარძელზე ან სკამზე დაჯექით (შეგიძლიათ იდგეთ). ზურგი გამართული და მხრები გასწორებული.
- ხელები იდაყვებში მოხარეთ და ხელისგულები მხრებს დაადეთ.
- ამის შემდეგ წინ წრიული მოძრაობა შეასრულეთ, შემდეგ უკან.
ვარჯიში ნელა შეასრულეთ.
მკლავებით მაქსიმალური დიამეტრის წრეების მოხაზვა სცადეთ, რომ პროცესში ყველა კუნთი ჩაერთოს. 15 წრე წინ და 15 წრე უკან შეასრულეთ. შეგიძლიათ წრეების მოხაზვა ვერტიკალურად გამართული ხელებით სცადოთ.
ვარჯიში №2
- ვარჯიში მჯდომარე ან მდგომარე პოზაში შეასრულეთ, როგორც გსურთ. უპირატესობა მჯდომარე პოზას ვანიჭებ. სკამზე დაჯექით, ზურგი და მხრები გამართეთ.
- ხელები განზე გაშალეთ. წარმოიდგინეთ, რომ მაკრატელი ხართ და ხელებით ჯვარედინა მოძრაობას ასრულებთ, როგორც სურათზეა ნაჩვენები.
- ხელებს ადგილები შეუცვალეთ. ჯერ ერთი ხელი მეორეს ზემოთ, შემდეგ პირიქით. 30-40-ჯერ გაიმეორეთ.
კუნთების გავარჯიშება იგრძენით.
ვარჯიში №3
- ამ ვარჯიშსაც მჯდომარე პოზაში ვასრულებთ, მთავარია არ მოიხაროთ. თავდაპირველად, ხელები თავს ზემოთ გამართეთ.
- შემდეგ იდაყვებში მოხარეთ და უკან გადახარეთ. ეს საწყისი პოზაა, როცა ტრიცეპსი მაქსიმალურად დაჭიმულია.
- ამ პოზიციიდან ხელები ზემოთ ასწიეთ და კუნთების დაჭიმვა იგრძენით.
დატვირთვის გასაზრდელად წიგნი, წყლით სავსე ბოთლი ან ჰანტელი გამოიყენეთ. ვარჯიში 25-30-ჯერ გაიმეორეთ. მომავალში ვარჯიშის შესრულება მხოლოდ ერთი ხელით (მონაცვლეობით) სცადეთ, მაგრამ ამის გაკეთება რთულია.
