უნივერსიტეტში ჩემი პროგრამის ყველა სტუდენტი შეისწავლიდა მეორე უცხო ენას: ფრანგულს, გერმანულს ან ესპანურს. მე ეს უკანასკნელი ავირჩიე და ჩემი მასწავლებელი იყო გოგონა, სახელად როზა – ესპანეთიდან, რომელიც ჩვენს მხარეში გაცვლითი პროგრამით ჩამოვიდა. სასწავლო წლის ბოლოს ესპანეთის კონსულთან ერთად სტუდენტებისთვის მოაწყვეს წვეულება. სტუმრად წასვლა ხელცარიელი არ არის მიღებული, ამიტომ მთელმა ჯგუფმა იყიდა ღვინო და ყვავილები. მასპინძლებმა საჩუქარი მიიღეს, მაგრამ რატომღაც არა სიხარულით. მოგვიანებით როზამ გვითხრა, რომ გეორგინების ჩუქება არ შეიძლება – ისინი დაკრძალვასთან ასოცირდება.
სხვა ხალხების ტრადიციების ცოდნა ძალიან მნიშვნელოვანია. მაგალითად, ირლანდიაში ცუდ მანერებად ითვლება ნაქსოვი სვიტერის ჩუქება, ინგლისში – ზოლიანი ჰალსტუხების. ცოტა სასაცილოც კია, არა? ვნახოთ, როგორია საჩუქრების ეტიკეტი ევროპაში.
რისი ჩუქება არ შეიძლება სხვადასხვა ქვეყანაში
საფრანგეთი: ქრიზანთემები, სუნამოები და ღვინო
საფრანგეთში ქრიზანთემის ჩუქება მიღებული არ არის, რადგან ისინი მიაქვთ მხოლოდ სამგლოვიარო ღონისძიებებისთვის. ხომ არ მომხდარა, რომ ვინმეს შეცდომით ლუწი რაოდენობის ყვავილების თაიგული მოურთმევია? წვრილმანია, მაგრამ უსიამოვნო. ფრანგი ადამიანი, რომელსაც თქვენ ქრიზანთემებს აჩუქებთ, დიდი ალბათობით, იმავეს იგრძნობს.
ყველა ქალი სიამოვნებით მიიღებს საჩუქარს სუნამოს სახით, გარდა ფრანგი ქალისა. საფრანგეთში ასეთი საჩუქარი მიღებულია მხოლოდ მეორე ნახევრისგან.
ქვეყანას ღვინისადმი განსაკუთრებული მიდგომა აქვს. ხშირად კერძები სპეციალურად სასმელზეა მორგებული, ამიტომ მისი არჩევა მასპინძლების პრივილეგიაა.
გერმანია: ჰიგიენის ნივთები, ბასრი საგნები, ფული
სხეულის მოვლის საშუალებები არის პირადი და ინდივიდუალური საკითხი. ყველას აქვს საკუთარი გემოვნება არომატთან, შემადგენლობასთან, თვისებებთან და კონსისტენციასთან დაკავშირებით. უარესი რა შეიძლება იყოს, როცა საჩუქრად მიიღებ ძვირადღირებულ ლოსიონს, რომელიც არ არის შესაფერისი შენი კანის ტიპისთვის. ან, მაგალითად, შამპუნს, რომლის სუნიც თქვენთვის უსიამოვნოა.
გერმანიაში, ისევე როგორც ჩვენთან, არ არის მიღებული ბასრი საგნების ჩუქება – ეს ცუდი ნიშანია.
მაგრამ საქორწილო საჩუქართან დაკავშირებით, პირიქითაა. ჩვენი ახალდაქორწინებულები სიამოვნებით იღებენ კონვერტს ფულით. გერმანელებს, თავის მხრივ, ასეთი საჩუქარი გაანაწყენებს. ისინი იფიქრებენ, რომ თქვენ მიანიშნებთ მათ ფინანსურ წარუმატებლობაზე.
პოლონეთი: ფეხსაცმელი, საათები
ერთი შეხედვით, ფეხსაცმელი ან საათი სრულიად უწყინარი საჩუქარია. თუმცა, პოლონეთში თვლიან, რომ ეს ჩხუბს იწვევს. აქვს თუ არა ამ ნიშანს მაგიური ძალა, ჩვენთვის უცნობია, მაგრამ ცხოვრებისეულ სიბრძნეს ნამდვილად ვერ უარყოფთ.
მაგალითად, თქვენ აჩუქებთ თქვენს შეყვარებულს კომფორტულ სახლის ჩუსტებს, რითაც თქვენს ქალურ ზრუნვას გამოხატავთ. ის კი, მადლიერების ნაცვლად, უკმაყოფილო იქნება. რატომ? ის ამას მინიშნებად მიიღებს, რომ დროა ერთად გადახვიდეთ საცხოვრებლად, თქვენ კი მხოლოდ ერთი კვირაა რაც ხვდებით.
ნიშნების მიხედვით, საათის ჩუქება არ შეიძლება, რადგან ის განშორებას ან უბედურებას აღნიშნავს. ითვლება, რომ ურთიერთობა მაშინ დასრულდება, როცა ნაჩუქარი საათი გაჩერდება. ორივე შემთხვევაში, ნიშნის მოტყუება შესაძლებელია იმით, რომ ადამიანისგან საჩუქრისთვის სიმბოლური თანხა მიიღოთ.
ნიდერლანდები: ძვირადღირებული საჩუქრები, ლურჯი შეფუთვა
ჰოლანდიელები ცდილობენ საჩუქრებზე ბევრი ფული არ დახარჯონ. კოლეგებისთვის რაიმეს ჩუქება საერთოდ არ არის მიღებული. ახლობლებს საჩუქრად პატარა სუვენირებს გადასცემენ, რომლებიც შემთხვევის შესატყვისია. დიდი ყუთი მდიდრული შეფუთვით – ნიდერლანდებში ადამიანს დისკომფორტს გაუჩენს. გარდა ამისა, არ უნდა აჩუქოთ ცისფერ შესაფუთ ქაღალდში ან პარკში: ეს ფერი სიყვარულის ფერად ითვლება. ასეთმა სიურპრიზმა შეიძლება დააეჭვოს ადამიანი თქვენს მეგობრულ ზრახვებში.
ლიტვა: სპილოს ძვლის ნაკეთობები
არასოდეს აჩუქოთ სპილოს ძვლის ნაკეთობა ლიტველს. ის იფიქრებს, რომ ზიანს და უბედურებას უსურვებთ. უცნობია, საიდან გაჩნდა ასეთი ნიშანი. იქნებ ლიტვაში, ისევე როგორც ტაილანდში, სპილო წმინდა ცხოველია?
საჩუქრის არჩევა ნიშნების გარეშეც არ არის ადვილი საქმე. და ამ შემთხვევაში კი ძალიან ფრთხილად უნდა იყოთ, რათა შემთხვევით არ აწყენინოთ არავის!
