სტატისტიკა აჩვენებს, რომ სულ უფრო მეტი ადამიანი პირადი გამოცდილებით იგებს, რა არის მარტოობა. გასაკვირია, რომ ახალგაზრდები პარტნიორის გარეშე ცხოვრებას ხშირად ირჩევენ. ამავდროულად, თითოეული მარტოხელა საზოგადოების ზეწოლას ეჯახება და თავისი დამოუკიდებელი სტატუსის ხშირად რცხვენია.
დღემდე ბევრი სტერეოტიპი ღრმად გამჯდარია. ითვლება, რომ მარტოხელა მოწყენილი და სევდიანია, რომ ის მეორე ნახევარს აქტიურად ეძებს და ვერ პოულობს. გავრცელებულია მოსაზრება, რომ თუ ადამიანი დიდხანს მარტოა, რაღაც რიგზე არ აქვს.
რა არის მარტოობა
გამოკითხვის შედეგების შესწავლისას მეცნიერები გაოცდნენ, რომ მარტოხელების ნახევარზე მეტს მარტოობის რცხვენია. ასეთი ადამიანების 60% თავისი ცხოვრებით კმაყოფილია, მაგრამ ეს ვერ იცავს აკვიატებული კითხვებისგან, რჩევებისგან და გარშემომყოფების ზეწოლისგან
სოციალური სტერეოტიპები გვარწმუნებს, რომ დაოჯახებული ხალხი უფრო ბედნიერად და სრულყოფილად ცხოვრობს, თუმცა ეს ყოველთვის სიმართლე არაა. ამავდროულად, მარტოხელის ცხოვრება მოსაწყენად და ტრაგიკულადაც ითვლება, ნათლავენ ეგოისტად, რომელიც მხოლოდ საკუთარ თავზე ზრუნავს.
საზოგადოების ზეწოლის სათანადოდ შეუფასებლობა არ ღირს, რადგან მას მტკიცე თვითშეფასების შერყევაც შეუძლია. ხშირად ადამიანი, რომელიც მეორე ნახევრის გარეშე კომფორტულად ცხოვრობს, გარშემომყოფების ზეწოლას ემორჩილება, საკუთარ თავზე აბიჯებს და „ნორმალური“ ოჯახის შექმნას ცდილობს. ასეთ მცდელობას ყოველთვის კარგი შედეგი არ მოსდევს.
რატომ აღიზიანებს ეს სხვებს
ფსიქოთერაპევტები განმარტავენ, რომ საზოგადოება განიკითხავს მარტოხელებს, რადგან ისინი მის მოლოდინებს არ ამართლებს. ამავდროულად, ქალზე ზეწოლა უფრო შესამჩნევია, ვიდრე კაცზე.
აღმოსავლეთის ბევრ ქვეყანაში მარტოხელა მამაკაცზეც ძლიერი ზეწოლა იგრძნობა. თუ 30 წლის ბიჭს ცოლ–შვილი არ ჰყავს, სამარცხვინო და არანორმალურია. ბოლო პერიოდში ასეთი „აღმაშფოთებელი“ შემთხვევები იზრდება.
და მაინც, საზოგადოების აზრი ნელ–ნელა იცვლება. თავის როლს თამაშობენ ცნობილი ადამიანები, რომლებიც ფანებს სოციალური ქსელების დახმარებით საკუთარ ხედვებს უზიარებენ. მაგალითად, 33 წლის ცნობილი მსახიობი ემა უოტსონი საკუთარ თავს საჯაროდ უწოდებს „დამოუკიდებელ პარტნიორს“, რითაც მხარდაჭერას გამოხატავს მათ მიმართ, რომლებმაც მარტოხელობა აირჩიეს.
კოვიდმა და შემდგომმა შეზღუდვებმა ხალხის აზრზე გავლენა მოახდინა. ბევრმა აღმოაჩინა, რომ თვითიზოლაცია არც ისე ცუდია, როგორც ფიქრობდნენ. თანამედროვე სამყაროში მარტოხელობა მისაღები არჩევანია, რომელსაც ბევრი დადებითი მხარე აქვს.
