უკვე საგრძნობლად აცივდა და დროა საკუჭნაოდან გამათბობელი გამოვიტანოთ და ჟოლოს მურაბა მივირთვათ. ჩვენს ოჯახში ციტრუსის სეზონი უკვე გაიხსნა. ფორთოხალს და მანდარინს უმად მივირთმევთ ან ნამცხვრის შიგთავსად ვიყენებთ. ჭამის შემდეგ ციტრუსის ქერქისგან სასუქს ვაკეთებ. ჩემი ყვავილები ზამთარში თავს ისევე კარგად გრძნობენ, როგორც ზაფხულში. ყველაფერი ტროპიკული სასუქის დახმარებით. როგორც კი საშუალება პირველად გამოვცადე, მაშინვე საშინელი ქინქლები მოვიშორე, მცენარე გამოჯანმრთელდა. საფუარივით იზრდება. Vivien სასუქის მომზადების მეთოდს გიზიარებთ.
როგორ მოვამზადოთ და გამოვიყენოთ ციტრუსის ქერქის სასუქი – ალბათ, არ იცით, რომ ფორთოხლის ქერქისგან ოთახის ყვავილების მხსნელი ნაყენი შეგიძლიათ მოამზადოთ. პირველ რიგში, მინის ქილა აიღეთ. ციტრუსის ქერქით ნახევრამდე გაავსეთ, მდუღარე წყალი დაასხით. 2–3 დღე გააჩერეთ. შემდეგ სითხე გადაწურეთ. ყვავილები ფესვებთან ამ ნარევით მორწყეთ. პროცედურა ზამთარში თვეში ერთხელ გაიმეორეთ, ხოლო ზაფხულში, გაზაფხულსა და შემოდგომაზე თვეში 3–ჯერ. თუ ოთახის მცენარე ძილის ფაზაშია, არ გამოკვებოთ, ხოლო ყვავილობის პერიოდში, გამოკვების სიხშირე გაზარდეთ. ციტრუსის ნაყენით ყვავილის ღერო და ფოთლები შეგიძლიათ დანამოთ. ეს კვირაში ერთხელ გააკეთეთ, რომ მცენარე დაიცვათ მავნე მწერებისა და ქინქლებისგან, რომლებიც ფოთლებს ჭამენ. კატები, ასევე მწერები, ციტრუსის სუნს ვერ იტანენ.
რა სარგებელი აქვს ასეთ სასუქს – ციტრუსის სასუქი მავნებლებთან ბრძოლაში დაგეხმარებათ. გამოცდილი მებოსტნეები ფორთოხლის ქერქს ჭიანჭველების, ბუგრების, ლოქორების, ობობის ტკიპების და სხვა მავნე მწერების მოსაშორებლად იყენებენ. ასევე მცენარეს აძლიერებს. ფორთოხლის ნაყენს 1 ს/კ გახეხილი სარეცხი საპონი დაუმატეთ, თუ ეფექტის გაძლიერება გსურთ. ასეთ საშუალებას ყველაზე ამტანი მავნებელიც ვერ გაუძლებს.
