ჩვენთან ტკბილი წიწაკა სათბურებში ან ღია გრუნტში უკვე დარგული აქვთ. ეს მისი გაშენების რეგიონზეა დამოკიდებული. პირადად, მე, სათბურში ვზრდი, რადგან ამინდის პირობები ამ ბოსტნეულის ღია გრუნტზე გაზრდის საშუალებას ჯერ არ მაძლევს. თუ გსურთ მსხვილი და ტკბილი წიწაკის გაზრდა და უხვი მოსავლის აღება, Vivien გირჩევთ, გადარგვის შემდეგ სასუქებით გამოკვება არ დაგავიწყდეთ.
წიწაკის ნერგს გადარგვის შემდეგ შეგუების დრო სჭირდება. 2 კვირაში შეგიძლიათ პირველი სასუქი მიაწოდოთ. პირველად, აუცილებლად აზოტის შემცველი სასუქი მიაწოდეთ, რომ წიწაკამ კარგი მწვანე მასა გაზარდოს და ბევრი ნასკვი წარმოიქმნას.
აზოტის სასუქად შეგიძლიათ გამოიყენოთ ბალახების ნაყენი. 1 ლ ნაყენი 10 ლ წყალზე აიღეთ. მეორე კომპონენტი – ცარცი. 200 გრ ცარცი 10 ლ წყალზე. ის აუცილებელია ნიადაგის მჟავიანობის შესამცირებლად, რადგან წიწაკა მჟავე ნიადაგში ცუდად იზრდება.
ასევე ცარცი შეიცავს კალციუმს, რომელიც წიწაკას ნასკვების ფორმირებისთვის სჭირდება. სველ მიწაში 1 ლ ხსნარით თითოეული ბუჩქი ფესვების ქვეშ მორწყეთ. სასუქი დილით ადრე ან საღამოს მიაწოდეთ. სასუქის ნარჩენები წიწაკის ფოთლების დასანამად შეგიძლიათ გამოიყენოთ.
წიწაკას მეორე გამოკვება ნასკვების ფორმირებისას სჭირდება. ისიც 1 ლ ბალახების სასუქის და 10 ლ წყლის ნარევისგან შედგება. ცარცი 2 ჭიქა ნაცრით ჩაანაცვლეთ, რომელიც ნიადაგის მჟავიანობას კარგად ამცირებს და წიწაკას სასარგებლო მიკრო და მაკროელემენტებს აწვდის.
ამ სასუქის „ხიბლი“ მასში შემავალი ბორის მჟავის ინგრედიენტია. სულ 2 გრ ბორის მჟავა დაგჭირდებათ. ბორის მჟავა ნასკვების კარგად ფორმირებას ხელს უწყობს, გემოს და ნაყოფის ხარისხს აუმჯობესებს, ასევე ნაყოფში ჭარბ აზოტს აქრობს.
თუ მწვანე სასუქი არ გაქვთ, 1 ს/კ ამონიუმის ნიტრატით ჩაანაცვლეთ. ყველა დანარჩენი კომპონენტი იგივე რაოდენობით დაუმატეთ.
ამ ორი სასუქის გამოყენების შემდეგ წიწაკა კარგად განაყოფიერდება. ნაყოფი მსხვილი, ხორციანი და ტკბილი გაიზრდება. ყოველთვის უხვ მოსავალს ვიღებ. ბევრ ბუჩქს არ ვრგავ, მაგრამ წიწაკა სადილის მოსამზადებლად და დასაკონსერვებლად მყოფნის, ხოლო ნაწილს მეზობლებს და ნათესავებს ვუგზავნი.
